To dikt om byen
I denne læringsstien bruker vi to dikt om byen som døme:
- Rudolf Nilsen: "Midt i byen", frå Hverdagen, 1929
Rolf Jacobsen: "Signaler", frå Jord og jern, 1933
Relatert innhald
Motiv og tema
I førlesingsfasen les du for å identifisere motiv og tema i dei to dikta. Med motiv meiner vi det ein tekst handlar om på det ytre, konkrete planet. Med tema meiner vi det ein tekst handlar om på eit djupare plan. Vi må sjå dei ulike momenta i teksten i samanheng for å kunne slå fast kva teksten «eigentleg» handlar om.
Del 1. Førlesing av "Midt i byen"
A. Jobb åleine
Når du førles diktet, skal du lese det fleire gonger. Etter kvar gong du har lese eit av dikta, skriv du ned tankane dine om kva diktaren vil formidle med diktet sitt. Det er viktig at du les diktet minst tre gonger, for du vil oppdage nye moment kvar gong du les det.
NB! Ikkje tenk på verkemiddel og fagomgrep enno, berre konsentrer deg om innhaldet.
B. Diskuter med ein medelev eller i gruppe
Kva er motivet og temaet til diktet?
Korleis blir byen framstilt i diktet?
Del 2. Førlesing av "Signaler"
A. Jobb åleine
Les diktet "Signaler" på same måte som du gjorde med "Midt i byen". Prøv å "gløyme" diktet du allereie har lese. Det er om å gjere å lese kvart dikt for seg sjølv.
B. Diskuter med ein medelev eller i gruppe
Kva er motivet og temaet i diktet?
Korleis blir byen framstilt i diktet?
Del 3. Samanlikn dikta
A. Jobb åleine
Les gjennom dikta på nytt, men no skal du sjå på dei frå samanlikningsperspektivet. Still deg sjølv spørsmåla: Kvifor har akkurat desse to dikta blitt valde ut? Kva er det som bør samanliknast? Kva bør eg leggje merke til?
Skriv ned det du vil leggje vekt på av likskapar og ulikskapar i dikta.
B. Diskuter med ein medelev eller i grupper
Finn de nokon likskapar eller forskjellar i motiv og tema i desse dikta?
Kva er temaet i dikta?
Korleis kjem det lyriske eg-et til syne i diktet?
Kvifor blei akkurat desse to dikta sett saman?
