Stress kan vere både positivt og negativt. Det kan vere ein positiv faktor i strategien vi møter truslar og farar med. Negativt stress oppstår gjerne når vi får ei kjensle av ikkje å strekke til, når det er mange ting vi skulle ha gjort, men ikkje rekk å gjere, eller når vi ikkje meistrar oppgåva vår.
Det er mange årsaker til stress. Ein lastebilsjåfør kan bli stressa om tida blir for knapp til å rekke alle leveringane til avtalt tid. Ein bussjåfør som ligg etter ruteplanen, kan oppleve det same. Ein skipsførar med mange småbåtar i fart rundt skipet vil kunne kjenne stress. Evna til å ta korrekte avgjerder blir redusert under stress, og vi blir meir disponerte for uhell.
Stress over lang tid kan føre til kroniske lidingar som mellom anna hjarte- og karsjukdommar og psykiske lidingar. Er du stressa? Gå inn på lenkja Stresstest i margen.
«Skulle berre …» er ei utsegn du kanskje kjenner til. Utsegna blir ofte brukt når vi skal gjere noko ekstra i ein stressa arbeidssituasjon. Vi «skal berre …», og så skjer det eit uhell. I mange tilfelle kjem det av at vi har nådd ei kapasitetsgrense, og at denne grensa blir overskriden.