Gods sendt med samlastspeditørar
Samlastspeditørar tek på seg fraktføraransvar for gods som skal sendast mellom byar og tettstader i heile Noreg. For å makte dette har samlastspeditørane ein sentralterminal i Oslo-området og regionterminalar i større byar rundt om i landet.
Kvar regionterminal har ansvaret for å hente inn og distribuere gods innan sin eigen region. Regionterminalane samlastar gods til andre regionar i konteinarar og sender dei til sentralterminalen i Oslo-området. Sentralterminalen sorterer innkommande transittgods til andre regionar og samlastar godset i konteinarar. Konteinarbilar transporterer så konteinarane til regionterminalane. Logistikkmedarbeidarane på regionterminalane sorterer deretter godset på distribusjonsruter, før distribusjonssjåførar leverer godset hos mottakarane.
Kundeforventningar
Godskundar forventar i dag å motta perfekte ordrar. Med det meiner vi ein ordre som
- er levert til rett tid
- er komplett
- er skadefri
- har korrekt dokumentasjon (faktura, pakkseddel, fraktbrev, tollpapir og så bortetter)
Både yrkessjåførar og logistikkoperatørar må bidra til å oppfylle desse krava.
Døme på logistikkoperatør
Henning arbeider som logistikkoperatør på ein samlastterminal. Han sorterer dagleg innkommande gods og behandlar det skånsamt for å unngå å skade godset. Skulle godset
likevel bli skadd, melder han straks ifrå, slik at avsendaren kan varslast. Når godset skal lastast i konteinarar etter at det er sortert, er Henning nøye med at alt gods som høyrer til same kolli, blir lasta i same konteinar, og ikkje i to ulike.
Henning ser ikkje kundane i arbeidet sitt. Han møter berre andre logistikkmedarbeidarar og yrkessjåførar. Han ser likevel på dei som internkundar og leverer alltid godset vidare som om det skulle vere til sluttkunden.