Marknadskommunikasjon. P for påverknad – eit samandrag
Ordet «communicare» er latin og betyr å «gjere felles». I marknadsføringssamanheng ønskjer vi å gjere felles eller kommunisere ein marknadsføringsbodskap om eit produkt, ei teneste, ein idé, ei meining eller ei haldning. Dette er påverknad vi utøver på målgruppa.
Dersom potensielle kundar ikkje veit kva vi har å tilby, vil dei ha vanskeleg for å velje akkurat våre produkt. Derfor er det viktig å kommunisere kva vi vil selje.
For å gjere dette riktig må marknadsførarar ha kunnskap om kommunikasjonsprosessen. Denne går ut på at marknadsføraren sender ut ein bodskap. Bodskapen er koda med symbol, til dømes bilete og språk som mottakaren forstår, og han blir send gjennom ein kanal som treffer riktig kunde. Når mottakaren ser bodskapen vår, blir han avkoda. Er vi dyktige, fører dette til kjøp, endring av haldningar eller anna som måtte vere målet med kommunikasjonen.
Kunsten er å finne riktig bodskap og formulere han på ein måte som treffer kunden midt i hjartet gjennom riktig val av argumentasjon og appell.