Berekraftige produktavgjerder

Opne bilete i eit nytt vindauge

CC BY-SA

Bilete: Siren Halvorsen

Det er viktig å tenkje på berekraft og å ha kunnskap om materiale og produksjonsprosessar for å ta etiske og berekraftige val.

God kvalitet gjer at produkt held lenger, og behovet for utskifting blir mindre. Om det er mogleg å reparere ei vare og halde ho ved like, kan det motverke ein «bruk og kast»-mentalitet.

Redesign, òg kalla omsaum, er ein skapingsprosess med utgangspunkt i noko som finst frå før. Både gjenbruk og redesign kan vere berekraftig, i og med at vi ser moglegheiter i noko som elles ville ha vorte kasta. Det kan òg vere haldningsskapande med tanke på korleis vi behandlar ressursane våre.

Mote- og tekstilindustrien som døme

Mote- og tekstilindustrien er den nest mest forureinande industrien i verda. Dei siste 20 åra har klesproduksjonen dobla seg, til over 100 milliardar plagg i året, og det er berre 1 prosent av kleda som blir resirkulerte. Ifølgje tal frå SIFO har nordmenn i gjennomsnitt 359 plagg i klesskapet. Kvart femte plagg blir sjeldan eller aldri brukt, og vi kastar i snitt 23 kilo klede kvart år.

Noko av det vi kan gjere for å redusere klimaavtrykket vårt, er å kjøpe færre klede og vere klar over kva materiale som er brukte til dei plagga vi kjøper, og korleis kleda blir produserte. Det å bruke kleda fleire gonger reduserer òg klimaavtrykket.

Reparasjon og redesign er viktige verkemiddel for å auke levetida til klede. Ingrid Bergtun er ein influensar som er oppteken av berekraft, saum og redesign av klesplagg. Ingrid er ein av medgründerane av Fæbrik, ei digital plattform i form av eit sykollektiv.

Eg brenn for å gjere klesindustrien meir berekraftig. Det er kult at saum og redesign blir sett og anerkjent som noko meir enn berre ein hobby, nemleg eit verktøy som kan vere med å påverke miljøet.

Ingrid Bergtun

Opne bilete i eit nytt vindauge

CC BY-SA

Bilete: Tomine Walmsness

I ei årleg kåring gjort av D2 og Dagens Næringsliv blei Ingrid Bergtun i 2020 nominert som ei av 30 leiestjerner basert på FNs berekraftsmål. Nedanfor kan du sjå eit intervju med Ingrid.

Og her kan du lese eit intervju med Ingrid Bergtun.

I filmen nedanfor får vi eit innblikk i forma og funksjonen til nokre produkt, og i kor viktig det er å fokusere på berekraftig utvikling.