Telefonsal og uønskt reklame

Opne bilete i eit nytt vindauge

CC BY-NC-SA

Bilete: Knut Høihjelle

Forbrukarombodet får mange klagar på uønskt telefonsal. Når vi driv sal og marknadsføring på telefon eller med adressert post, skal vi oppdatere adresseregisteret vårt mot Reservasjonsregisteret for direktemarknadsføring.

Forbrukarar kan reservere seg både mot telefonsal og adressert reklame på nettsida til Brønnøysundregistera, ved å logge inn på Reservasjonsregisteret med ID.

Det er enkelt og gebyrfritt å reservere seg mot slike førespurnader. Dette gjeld òg for innsamlingsaksjonar til frivillige organisasjonar. Du kan angi at reservasjonen likevel ikkje skal gjelde frivillige organisasjonar.

Reservasjon i Reservasjonsregisteret gjeld ikkje marknadsføring der det eksisterer eit kundeforhold.

Næringsdrivande kan ikkje reservere seg i Reservasjonsregisteret.

Om du ønskjer å sende ut reklame retta mot privatpersonar som kundar, er du pliktig til å oppdatere listene mot Reservasjonsregisteret minst kvar månad.

Det er forbode å rette marknadsføring med telefon eller adressert post til personar som har reservert seg mot dette i Reservasjonsregisteret eller direkte hos den næringsdrivande.

I §§ 12 og 13 i marknadsføringslova blir retten til reservasjon og verknader av reservasjonen beskrivne. § 14 har ei føresegn om at det er forbode å rette marknadsføring ved telefon til forbrukarar på visse dagar og tidspunkt. Det gjeld mellom anna laurdagar og helgedagar og vyrkedagar før klokka 9.00 og etter klokka 21.00.