Om oppgåva
I arbeidet med denne oppgåva vil du komme inn på mange av dei sentrale områda i faget. Dette er ei oppgåve du bør jobbe med over lang tid. Mange av punkta i læreplanen handlar om Noreg og norske forhold. Gjennom å samanlikne Noreg med eit anna land som er annleis vil du få ei djupare forståing av det norske samfunnet, samstundes som du vil sjå at velferda og fridommen vår ikkje kan takast for gitt.
Du vil òg lære om globale utfordringar som menneskerettar, konfliktar, forskjell og berekraft. Du får moglegheita til å få ei djupare og meir konkret forståing for eit framandt land, eller kanskje eit land du har eit forhold til frå før. Ei slik innsikt er det vanskeleg å få når ein generaliserer og snakkar om "dei fattige landa", nyindustrialiserte land, Midtausten, Sør-Amerika eller Afrika sør for Sahara.
Oppgåva kan brukast til vurdering og kan vise kompetanse i store delar av læreplanen. Læraren kan justere omfanget av oppgåva ved å bestemme kor lang tid de skal bruke, kor langt de skal skrive eller kor lang presentasjonen skal vere, og ved å ta bort punkt frå lista under.
Førebuingar
Vel eit land som du tenkjer er ganske annleis enn Noreg på mange måtar.
Sett deg godt inn i følgjande sider ved Noreg og det landet du har valt:
- næringsgrunnlag
- styreform
- ideologiske motsetningar
- interne konfliktar
- økonomisk modell
- organisering av arbeidsliv
- velferd
- sosial forskjell
- levestandard og livskvalitet
- menneskerettar
- berekraftig utvikling
Ta notat undervegs og ta vare på alle kjelder du bruker, slik at du kan finne tilbake til dei og leggje dei i kjeldelista.
Husk å vere kritisk til kva kjelder du vel. Bruke gjerne TONE-strategien i lenka under.
Relatert innhald
Produkt
Arbeidet bør resultere i ein lengre tekst eller ein presentasjon der du fokuserer på:
- samanlikning av dei to landa på dei ulike punkta
- årsaker til likskapar og forskjellar
- samanhengar mellom dei ulike punkta
- kan landa lære noko av kvarandre?
Du bør avslutte med ein konklusjon eller oppsummering.