Innleving i karakterar
Vi identifiserer oss gjerne med personar vi blir kjende med gjennom film, litteratur og teater. Sjølv om dei lever andre liv, kan vi ofte kjenne oss igjen i sorger, gleder og utfordringar dei møter.
Korleis kan du skape ein truverdig karakter til medieproduksjonen din? Det første du må gjere, er å setje deg inn i kven personen er, og korleis hen ser ut. I desse oppgåvene skal du utforske kjende karakterar og skape ein eigen truverdig karakter.
1. Lag ei personskildring av ein kjend karakter
Vel ein karakter frå ein serie eller ein film som fascinerer deg. Dersom du vil, kan du velje ein av dei fem karakterane frå presentasjonen under.
Bruk fleire kjelder og finn ut korleis personen ser ut, og kva karaktertrekk hen har.
Dersom du vel ein karakter frå ein historisk periode, bør du òg undersøke korleis moten var på denne tida.
2. Lag ei personskildring av ein karakter du sjølv diktar opp
Beskriv korleis personen ser ut, kva eigenskapar hen har, og kva slags tid og miljø karakteren høyrer heime i.
Lag skisser til korleis du kan bruke hår og sminke til å få fram uttrykket du ønsker.
Vurder om du skal bruke spesialeffektar. Lag i så fall skisser til korleis du kan løyse dette med tilgjengeleg programvare og utstyr.
3. Gjennomføring
Samarbeid med ein medelev, og byt på å vere modell for kvarandre.
Ta bilete av personen som skal sminkast, før de byrjar. Fotografer undervegs i arbeidsprosessen og når karakteren er ferdig.
Bruk, sminke, hår og eventuelle spesialeffektar til å skape karakteren du valde i del 2.
Ha god dialog med modellen din. Forklar kva teknikkar du bruker, og kva slags verknad du ønsker å oppnå med dette.
4. Dokumentasjon og eigenvurdering
Ta utgangspunkt i personskildringa i del 2 og vurder korleis du har klart å attskape denne karakteren.
Beskriv korleis du har jobba gjennom bilete og tekst. Kva erfarte du gjennom utprøvingane dine, og korleis påverka dette vala dine?
Vurder kvaliteten i arbeidet ditt.
