Hopp til innhald
Eigenvurdering

Eigenvurdering og kvarandrevurdering i videoproduksjon

Få tips til korleis du kan vurdere eigne og andre sine videoproduksjonar. Det kan bidra til betre praksis og resultat.
Tre gutar med briller smiler mot kameraet. Dei ber på videokamera og ein mikrofonbom. Manipulert foto.
Bilete: Tom Knudsen / CC BY-SA 4.0

Be om tilbakemelding

Be om tilbakemelding på det du produserer frå eit par medelevar.
Å be om tilbakemeldingar er kanskje det viktigaste du kan gjere for å forbetre produksjonen din. Likevel kan det lett opplevast som sårt og ubehageleg, fordi du har lagt ned mykje tid og sjel i produksjonen.

Å venje seg til å få tilbakemeldingar og å lære seg å distansere seg noko frå produksjonen er viktig for å få best mogleg utbytte av tilbakemeldingane.

Tips til kva du kan spørje om i ei tilbakemelding

  • Kva inntrykk sit dei igjen med? Stemmer inntrykket overeins med det du hadde planlagt?

  • Kva synest dei er dei sterkaste og svakaste sidene ved produksjonen?

  • Har dei spesifikke forslag til forbetringar?

Vurdere andre sine produksjonar

Sjå og lytt gjennom heile produksjonen før du svarer på desse spørsmåla.

  • Er det ein fin og naturleg flyt?

  • Er lengda passeleg, og verkar strukturen fornuftig?

  • Kva synest du er den største styrken til produksjonen?

  • Kva ville du gjort annleis, og korleis?

  • Har medeleven din brukt liknande verkemiddel som deg? Korleis synest du dei fungerte i dei ulike tilfella?

  • Er det element i andre sin produksjon som du kunne tenkt deg å bruke i din eigen?

  • No som du har høyrt og sett andre sine produksjonar, ser du område som kunne vore forbetra i din eigen produksjon?

Tips for tilbakemelding til andre

  • Trekk fram både styrkar og svakheiter med den andre sin produksjon.

  • Ver konkret når du beskriv kva du synest fungerer bra eller mindre bra i andre sine produksjonar.

  • Hugs at du kanskje ikkje er i den planlagde målgruppa for produksjonen.

  • Kom gjerne med spesifikke forslag til forbetringar.

Når er det fornuftig med tilbakemeldingar?

Allereie mens du arbeider med ideen til ein produksjon, kan du spørje om tilbakemeldingar. Til dømes kan du spørje om kva andre tenkjer om ideen. Kanskje finst det vinklingar til temaet som du har oversett? Kanskje finst det kjelder og innhald som passar til temaet, men som du ikkje kjenner til?

Ofte vil du be om tilbakemeldingar når du har laga førsteutkastet til produksjonen. Du har enno ikkje gjort finpussen, men du har fått på plass strukturen du har tenkt til å ha. Tilbakemeldingar om strukturen og opplevinga av flyt og tidsfordeling kan vere nyttig i denne fasen.

I ettertid kan tilbakemeldingane vere meir fullstendige. Då kan målet vere vidare utvikling, til dømes viss du skal lage ein heil serie eller fleire produkt.

Hugs at tilbakemeldingar ikkje er ein fasit. Det er meininga til ein annan person. Det er lov å vere ueinig og å oversjå tilbakemeldingane du er ueinig i. Fokuset bør liggje på kva du kan gjere for å auke kvaliteten.

Eigenvurdering

Å vurdere eigne produksjonar er utfordrande. Du mister objektiviteten og ser deg lett blind på innhaldet. Det kan derfor vere lurt å la produksjonen liggje før du prøver å vurdere han på nytt.
Det er lett å vere sjølvkritisk. Pass på at du fokuserer på eit ønske om å forbetre produktet ditt.

  • Kan du jobbe med verkemiddel?

  • Legg du vekt på dramaturgi?

  • Har du rytme i klippinga?

  • Finst det uvesentlege element som kan fjernast?

  • Kan du kutte på lengda utan å miste samanhengen i historia?

Eigenvurdering etter lengre tid


Viss du ventar såpass lenge at du har gløymt mange av detaljane i arbeidet, er det mogleg å skape seg eit nytt førsteinntrykk. Det kan ta veker eller månader før dette skjer, men det kan vere nyttig for å få eit ferskt inntrykk av flyten og av om medieuttrykka heng naturleg saman.