Inflammatorisk ryggsjukdom (Bekhterevs sjukdom)
Kroniske revmatiske betennelsar i ryggsøyla og i ledda mellom rygg og bekken startar vanlegvis mellom 18- og 40-årsalderen. Tilstanden er hyppigare hos menn enn hos kvinner. I underkant av éin prosent av befolkninga har inflammatorisk ryggsjukdom, det vil seie om lag 30 000–40 000 nordmenn. Sjukdommen inngår i undergruppa betennelsesaktige sjukdommar av dei revmatiske sjukdommane.
Dei vanlegaste plagene er smerte og stivleik, ofte i korsryggen og mellom skulderblada.
Ryggstivleik kjem ofte etter kvile.
Ryggsmertene kan tidvis minne om isjias, med strålesmerter ut i setet og ned i beina.
Viss brystkassa blir angripen, kan dette forvekslast med smerter knytte til hjartesjukdom.
Enkelte får smerter i auget og betennelse i regnbogehinna.
Lege stiller diagnose på grunnlag av sjukehistorie, funn ved legeundersøking og blodprøver og gjennom biletundersøkingar som røntgen, MR og CT. Smerteperiodar på meir enn tre månader hos personar under 45 år gir mistanke om diagnosen.
Målet med behandlinga er å redusere smerter og stivleik, motverke feilstillingar, bremse sjukdomsaktiviteten og forbetre livskvaliteten.
Daglege øvingar er essensielt for å hindre stivleik og feilstilling. Varm dusj om morgonen før ryggøvingar og dessutan symjetrening i oppvarma basseng kan vere nyttig.
Utfordringar til deg
Forklar omgrepet inflammatorisk ryggsjukdom.
Ryggsmerter er vanlege, derfor blir Bekhterevs sjukdom ofte ikkje diagnostisert før det har gått fleire år. Kva er symptoma?
Kva behandling kan hjelpe på Bekhterevs sjukdom?
Norsk helseinformatikk (2021, 27. april). Inflammatorisk ryggsykdom (Bekhterevs). https://nhi.no/sykdommer/muskelskjelett/bekhterev/bekhterev-oversikt/