For at vi skal byggje hus, vegar, kraftverk og alt anna vi har behov for, trengst det mange forskjellige yrke. Her presenterer vi mange av yrka. Du får vite kva dei forskjellige handverkarane gjer. Vi viser noko av den grunnleggjande kunnskapen som trengst for å arbeide i byggjebransjen.

Som anleggsgartnar jobbar du med nyanlegg, drift og vedlikehald av alle typar uteanlegg. Ofte jobbar du saman med andre yrkesgrupper og kan ta del i byggjeprosjekt.

Du nyttar deg mykje av naturmateriale som jord, plantar, stein og tre.

Anleggsgartnarar utfører arbeidsoppgåver knytte til stell og vedlikehald på etablerte uteanlegg heile året. Dei utfører alt frå å strø, klippe plenar og plukke søppel til å halde ettersyn med leikeområde, skjering av tre og buskar, utplanting av sommarblomstrar og vårarbeid i eit parkanlegg.