Fokus

Dei fleste digitale speilreflekskameraa har ein autofokus-funksjon som gjer jobben for deg. Alt du treng å gjere då, er å trykkje utløysarknappen på kameraet halvvegs ned og halde han der. Kameraet vil kan hende gi lyd eller eit lys i søkjaren som bekrefter fokuseringa. Deretter er det berre å trykkje heile vegen ned på utløysaren for å fange biletet.

Autofokusfunksjonen kan bli lurt både av andre motiv som rører seg i bakgrunnen, og av vanskelege lystilhøve. Hugs at kameraet ikkje veit kva du vil ta bilete av! I slike tilfelle kan det vere betre å bruke manuell fokusering, eller låse fast fokusområde i biletet.

Kamera frå ulike produsentar har ikkje like mange fokuspunkt. Fokuspunkta er små firkantar som blir viste når du kikkar på motivet ditt gjennom okularet («kikholet»), eller på skjermen bak på kamerahuset. Desse firkantane kjem sjølvsagt ikkje med på biletet du fotograferer, dei er berre ein del av biletinformasjonen som blir vist på skjermen din. Fokuspunkta blir brukte til å velje kor på biletflata du ønskjer å skarpstille. Firkanten i midten er som regel førehandsvald, men du kan fritt velje andre fokuspunkt om du ønskjer å leggje fokus meir mot venstre eller høgre i biletet.

Du kan låse fast eit område av motivet som du vil skal vere heilt i fokus. Det kan vere spesielt nyttig når motivet er i rørsle.

Filmklipp: Fokus og fokuspunkt

Å fokusere er ikkje det same som å bruke zoom på objektivet. Dersom du vil fokusere manuelt, må du hugse på å slå av autofokus-funksjonen (AF) og bruke fokus-ringen (1), ikkje zoom-ringen (3) på objektivet.