Årsplan for vg2 barne- og ungdomsarbeidarfag

Barne- og ungdomsarbeidarfaget skal utvikle yrkesutøvarar som kan legge til rette for at barn og unge får ein trygg oppvekst og allsidig utvikling i ulike institusjonar. Dei skal utvikle kompetansen sin til å ta vare på behova til barn og unge for omsorg, leik og aktivitet og kunne velje innhald og arbeidsmåtar som stimulerer til livsutfalding, undring, utforskartrong og skaparglede. Dei skal velje metodar som fremmar trivsel, meistring, læring og danning.

Omsorg er grunnleggande i barne- og ungdomsarbeidarfaget og skal ligge til grunn for alt arbeidet ein barne- og ungdomsarbeidar gjer. Utdanninga skal bidra til at elevane utviklar evna til å reflektere og tenke kritisk over eigne haldningar og verdiar og ansvaret til barne- og ungdomsarbeidaren i arbeidet med barn og unge.

Vi har laga eit forslag til årsplan med tema som utgangspunkt for arbeidet med kompetansemåla. Bakgrunnen for ein temaplan er at ein barne- og ungdomsarbeidar treng heilskapleg kompetanse for å utøve yrket og for få forståing for at det er ein samanheng mellom kompetansemåla i dei ulike faga – alt heng saman. Temaa har derfor innhald og arbeidsoppgåver som dekker fleire av eller alle programfaga. Vi håpar planen kan vere til inspirasjon! Last gjerne ned og tilpass han til elevgruppa di og miljøet ditt.

Det er mogleg å trykke på dei ulike emna under faga, desse inneheld lenker. Lenkene fører deg til fagartiklar og oppgåver i det aktuelle emnet på ndla.no. Trykker du på kompetansemåla, vil lenka føre deg til Utdanningsdirektoratet sine nettsider og kompetansemåla i faget.

Elevane må få høve til å tileigne seg kompetanse og vise denne gjennom munnlege, skriftlege og praktiske aktivitetar. Når elevane får vurderingar undervegs, bidreg det til å fremme læring og til å utvikle kompetansen vidare. For å rettleie elevane om vidare læring i programfaga må læraren vere i dialog med elevane om den faglege utviklinga deira. På den måten får elevane høve til å uttrykkje kva de opplever å meistre og til å reflektere over si eiga faglege utvikling.

Praktiske aktivitetar og øvingar gir elevane høve til å nytte kunnskapar, øve på ulike ferdigheiter og ta i bruk kritisk tenking til å løyse arbeidsoppgåver i programfaga. Fagsamtalar og refleksjonar (både munnlege og skriftlege) undervegs og i etterkant av desse aktivitetane vil hjelpe eleven til refleksjon og kritisk tenking. Læraren har då høve til å vurdere korleis eleven viser forståing, viser evne til refleksjon, meistrar utfordringar og løyser oppgåver i ulike samanhengar, og til å gi rettleiing om vidare læring.

NDLA har laga ressursar på tvers av fag som kan vere nyttige ved skulestart og gjennom heile året. Ein av ressursane er Verktøykassa. Her finn du mange fagartiklar og oppgåver knytte til ein god skulestart og korleis skape eit trygt og utviklande skulemiljø. Du finn òg mange andre gode tips og råd her.

• Verktøykassa – for elevar

• Verktøykassa – for lærarar

For elevar på barne- og ungdomsarbeidarfag er det nyttig å øve på framføringar og presentasjonar. Dei to ressursane 11 kreative tips til framføringar og Presentasjonar er fagstoff og oppgåver som gir elevane innsikt i kva dette er, og moglegheit til å øve.

Samfunnskunnskap, norsk og kroppsøving har kompetansemål som gjer det mogleg å samarbeide om ulike prosjekt i løpet av året. Eit tips er å gå gjennom kompetansemåla i desse faga og lage ulike prosjekt som kan gjennomførast i alle faga.