Lag moodboards for ei skulekantine

Opne bilete i eit nytt vindauge

CC BY-NC-ND

Bilete: Knut Snare

Ei berekraftig og sunn kantine med 25 prosent økologisk mat, heilt i tråd med nasjonale retningslinjer. Slik blir mattilbodet i den nye skulekantina, kan rektor stolt fortelje. No treng han hjelp av deg til å oppdatere den grafiske profilen, mellom anna for å kunne trykkje opp nye menyar og plakatar. Det visuelle uttrykket bør kle det sunne mattilbodet og samtidig gi elevane lyst til å bruke kantina.

1. Lag to moodboards med kvar si stilretning du meiner kan fungere på menyane i denne skulekantina. Tenk på kva og til kven du skal selje.
2. Bestem deg for kva for eit moodboard du meiner fungerer best for målgruppa.
3. Planlegg ein pitch av det designet du synest fungerer best. Prøv å bruke NABC-metoden i pitchen din!
4. Set deg i ei gruppe på 4–6 elevar. Gruppa utgjer «vassholet» ditt, der du kan få tilbakemeldingar og forbetringsforslag. Halve gruppa skal fokusere på kva som er bra med ideen som han er, mens den andre halvdelen skal kome med forslag til korleis han kan bli endå betre.
5. Pitch ideane for kvarandre, og gi tilbakemeldingar.
6. Bruk tilbakemeldingane til å vidareutvikle ideen og pitchen din.
7. Presenter den visuelle profilen du har valt, ved å vise fram moodboardet i klassen.

1. Kor godt lykkast du med å lage moodboards som tydeleg viste kvar si visuelle retning?
2. Grunngi kvifor du valde det eine moodboardet framfor det andre.
3. Kva fekk du til, og kva bør du øve på med moodboardet?
4. Kor godt lykkast du med å bruke NABC-metoden i pitchen din?
5. Kva fekk du til, og kva bør du øve på med NABC-metoden?
6. Kva fekk du ut av tilbakemeldingane ved «vassholet», og korleis brukte du dei?
7. Korleis var det å bruke denne metoden for å planleggje ein presentasjon?
8. Kva vil du gjere annleis neste gong du får ei liknande oppgåve?