Observere avføring frå kyr og kalvar

Avføringa kan fortelje oss mykje om helsetilstanden til eit dyr. For å kunne sjå om eit dyr har unormal avføring (til dømes diaré, blod i avføring eller liknande), er det viktig først å vite kva som er normal avføring, for å ha eit samanlikningsgrunnlag.

Vel to sinkyr, to kyr i produksjon og to kalvar. Observer avføringa og beskriv det så nøye som mogleg. Få med farge, konsistens, fôrpartiklar, form og lukt.

• Vel deg ut eit dyr. Det kan vere lurt å ta eit dyr som ligg, for det vil ofte gjere frå seg når det reiser seg. Eller du kan følgje med på dyra som står og går, og sjå om nokon av dei gjer frå seg.
• Beskriv kva du ser.
• Bruk gjerne det vedlagde skjemaet til å dokumentere.

• Konsistens: For å bedømme konsistensen kan du trakke forsiktig i avføringa og sjå kor tydeleg støvelmerket er i avføringa. Dess tydelegare du ser mønsteret etter støvelen i avføringa, dess hardare er konsistensen.
• Fôrpartiklar: Kan du sjå restar av fôr (gras) i avføringa? Kor lange er desse restane?
• Lukt: Luktar det meir eller mindre enn normalt? Kva er normal lukt?
• Beskriv form og farge.