Tannhelsetenestelova

Prioriterte pasientgrupper

I samsvar med tannhelsetenestelova §1-3 er følgande grupper i befolkninga prioriterte for å få nødvendig tannhelsehjelp:

Gruppe A

barn og ungdom frå fødsel til og med året dei fyller 18 år

Gruppe B

personar med psykisk utviklingshemming, både i og utanfor institusjon

Gruppe C

eldre, langtidssjuke og uføre som bur på institusjon eller får heimesjukepleie

Gruppe D

unge vaksne frå året dei fyller 19, til og med året dei fyller 28 år

Gruppe E

personar med rusmiddelavhengnad som får spesielle helsetenester

Gruppe F

innsette i fengsel

Gruppe G

andre grupper fylkeskommunen ønsker å prioritere

Den offentlege tannhelsetenesta prioriterer pasientgruppene alfabetisk etter desse gruppene, så gruppe A har høgast prioritet.

Lågast prioritet har vaksne som ikkje høyrer til nokon av dei prioriterte gruppene. Dei kan få tilbod om tannhelsehjelp dersom den offentlege tannhelsetenesta har ledig kapasitet, men då må dei betale sjølve. Til dømes kan styresmaktene vedta at den offentlege tannhelsetenesta tek ansvar for vaksne pasientar i område med få private tannlegar.

Rett til gratis tannhelsehjelp

Prioriterte pasientgrupper, med unntak av gruppe D, har rett til gratis tannhelsehjelp ved offentlege tannklinikkar. For nokre grupper blir det stilt bestemde vilkår for å få denne hjelpa. Dersom vilkåra ikkje blir oppfylte, har dei berre rett til akutt tannhelsehjelp.

Gruppe A

Barn og ungdom frå fødsel til og med det året dei fyller 18 år har rett til gratis tannhelsehjelp. Det er ingen dokumentasjonskrav, for tannhelsetenesta innhentar opplysningar frå folkeregisteret.

Gruppe B

Alle innbyggarar med psykisk utviklingshemming har rett til gratis tannhelsehjelp. Det trengst ei diagnostisert psykisk utviklingshemming, dokumentert gjennom ein attest som stadfestar diagnosen.

Gruppe C

Eldre pasientar som bur på institusjon, må ha opphalde seg der i minst tre månader for å ha rett til gratis tannbehandling. Denne retten fell bort viss pasienten flyttar frå institusjonen. For eldre personar som får heimesjukepleie, krevst det at helsehjelpa har blitt gitt minst éin gong i veka over ein periode på minst tre månader. Dersom heimesjukepleia stansar, mister pasienten retten til gratis tannbehandling. Årleg oppdatering frå kommunen er nødvendig for å sikre korrekt dokumentasjon.

Gruppe D

Unge vaksne frå året dei fyller 19, til og med året dei fyller 28 år, får redusert pris for tannbehandling: Dei betaler 25 prosent av eigendelen. Dei som har mellombels opphaldsløyve i Noreg og kjem frå land utanfrå EU/EØS, må ha budd i Noreg i fem år for å ha rett til nødvendig tannhelsehjelp. Det er ingen dokumentasjonskrav, for tannhelsetenesta innhentar opplysningar frå folkeregisteret.

Gruppe E

Personar med rusmiddelavhengnad har rett til gratis tannhelsehjelp dersom dei oppfyller følgande vilkår: får personleg assistanse, har pårørande som får avlastingstiltak, eller deltek i legemiddelassistert rehabilitering (LAR). Det er ein føresetnad at hjelpetiltaka har vart eller er meint å vare i tre månader eller meir. Det er krav om årleg dokumentasjon frå kommunen.

Gruppe F

Innsette i fengsel med opphald lenger enn tre månader skal få tilbod om gratis tannbehandling. Dokumentasjonskrav er utfylt attest frå fengselet.

Gruppe G

Her finn vi andre grupper som fylkeskommunen har vedteke å prioritere. Dette kan inkludere personar med psykiske lidingar som får poliklinisk behandling i spesialisthelsetenesta i minst tre månader, eller personar som får pleie av pårørande. Ein føresetnad er at pasientane i denne gruppa ikkje får lønn, sjukepengar eller arbeidsavklaringspengar. Årleg dokumentasjon frå spesialisthelsetenesta og stadfesting på uførleik er påkravd.