Søke hjelpemiddel

Hjelpemiddel skal hjelpe menneske med ulike funksjonsnedsetjingar, uansett alder og arena, til å fungere betre i kvardagen. Hjelpemiddel i denne samanhengen er ikkje hjelpemiddel det er vanleg å ha, eller som kan kjøpast i vanlege butikkar. Dette er hjelpemiddel som er spesialutvikla for personar med funksjonsnedsetjingar.

Målet er at hjelpemidla skal hjelpe kvar enkelt til å klare seg i arbeid, bustad, fritid og aktivitetar. Dette kan bidra til å auke deltakinga og aktiviteten, sjølvstendet og meistringskjensla til personane. For å få hjelpemiddel må du vere medlem av folketrygda, og alle som oppfyller kriteria i folketrygdlova, har krav på hjelpemiddel.

Nav Hjelpemiddelsentral finst i alle regionar i heile landet. Hjelpemiddelsentralen har ansvar for å formidle hjelpemiddel til menneske med ulike funksjonsnedsetjingar, uavhengig av alder og funksjonsnedsetjingar. Dei gir òg tolketenester til døve, døvblinde og høyrselshemma. I tillegg gir dei råd og rettleiing om hjelpemiddel til helse- og omsorgstenesta i kommunane og fylkeskommunane.

Det er ansvaret til kommunen å formidle hjelpemiddel til personar som treng det, og å legge til rette miljøet rundt kvar enkelt. Tilsette i kommunen har derfor ansvar for det følgande:

• avdekke og greie ut behovet for alle typar hjelpemiddel

• utprøving av hjelpemiddel

• bistand i søkeprosessen

• tilpassing og enkel montering av hjelpemiddel

• opplæring i bruken av hjelpemiddel

• service og reparasjon av hjelpemiddel

Når ein person skal søke om å få hjelpemiddel, må ein fagperson kartlegge kva funksjon og behov personen har. Søknad med dokumentasjon, beskriving og grunngiving av behovet blir send Nav. For nokre hjelpemiddel er det òg krav om utfylling av bestemde tilleggsskjema, der Nav ber om informasjon om til dømes kroppsmål eller tilleggsvanskar.

Når du skal bestille hjelpemiddel for andre, må personen du skal bestille for, ha eit vedtak på hjelpemiddel frå Nav frå før, og du må vere godkjent bestillar. For å bli godkjent bestillar må du ta godkjenningskurs for bestillingsordninga i Kunnskapsbanken hos Nav.

Navs nettside FinnHjelpemidler inneheld ei oversikt over dei ulike hjelpemidla som det er mogleg å søke om for å hjelpe andre til å fungere betre i kvardagen. Her finn du òg informasjon om dei ulike produkta, tekniske spesifikasjonar, bilete og video, brosjyrar og brukarrettleiingar.