Barne- og ungdomsarbeidarar fortel om jobben sin

Å vere barne- og ungdomsarbeidar inneber mykje ansvar, men det er svært meiningsfullt arbeid. Det er eit yrke der du vil bety noko for dei menneska du møter, og du kan bidra til å gjere ein forskjell.

Ein barne- og ungdomsarbeidar jobbar med barn eller ungdom. Du kan jobbe i barnehage, barneskule, skulefritidsordning (SFO), ungdomsskule eller vidaregåande skule. Ein barne- og ungdomsarbeidar kan òg jobbe i fritidsklubb og med barn som har behov for spesiell tilrettelegging, til dømes i ein barnebustad eller tilpassa opplæring i skule og SFO.

Mange vel å bli barne- og ungdomsarbeidar fordi dei er glade i barn og har eit brennande engasjement for at barn og unge skal ha det bra.

Det viktigaste når ein er barne- og ungdomsarbeidar er å vere ein nær, varm, kjærleg og god vaksenperson som bidreg til at barn og unge kjenner seg viktige og verdifulle. Du skal vise omsorg, verne og trøyste. Du skal bidra til å hjelpe og støtte barn og unge med alt det dei ikkje klarer sjølve. Støtte, hjelpe og rettleie barn og unge i leik, aktivitetar og samvær på ein slik måte at dei føler seg trygge og tør å utforske verda slik at læring og utvikling skjer. Du skal vere både leikekamerat, ven og ein god rollemodell.