Å arbeide som brukarstyrt personleg assistent

Brukarstyrt personleg assistanse (BPA) er ein alternativ måte å organisere den praktiske og personlege hjelpa til menneske med nedsett funksjonsevne på. Dette er menneske som treng assistanse i dagleglivet – både i og utanfor heimen.

Brukaren har då ei arbeidsleiarrolle og har eit større ansvar for å organisere og bestemme arbeidsoppgåvene og tenestene ut frå sine eigne behov. Målet er at brukaren skal ha moglegheit til å leve eit aktivt og mest mogleg uavhengig liv trass i nedsett funksjonsevne.

Dersom brukaren heilt eller delvis ikkje er i stand til å vere arbeidsleiar sjølv, vil arbeidsleiarrolla varetakast av andre på vegner av eller i samarbeid med brukaren.

Å arbeide som BPA kan omfatte praktisk og personleg assistanse til alle gjeremåla i dagleglivet i heimen og i tilknyting til hushaldet. I tillegg kan det vere behov for å bidra slik at brukaren får tilfredsstilt sosiale behov som moglegheit for samvær, sosial kontakt, fellesskap og aktivitet.

Arbeidsoppgåvene vil vere tilpassa behova til brukaren og kan til dømes vere å gi praktisk hjelp og assistanse til

• å vareta personleg hygiene og naturlege funksjonar (toalett)

• å legge seg, stå opp, dusje og vaske seg, av- og påkleding

• å sjølv vareta eigenomsorg

• innkjøp av varer, matlaging og gi tilpassa hjelp under måltidet

• vask av klede og bustad

• å leve eit aktivt liv i fellesskap med andre