Film og filmklipp
Framandlekam i luftvegane
Ein framandlekam i luftvegane kan raskt føre til ein svært kritisk situasjon. Førstehjelpstiltak er derfor viktig for å skape eit indre trykk slik at framandlekamen blir pressa ut. Barn er spesielt utsette, men òg eldre og svekte personar.
Video: Jarle Sten Olsen / CC BY-ND 4.0
- Akutte pustevanskar og hoste.
- Panikkjensle, personen tek seg gjerne til halsen.
- Ved fullstendig tilstopping vil personen først bli raud i ansiktet, deretter blå og gispe etter luft.
- Personen klarer verken å snakke eller hoste.
Ring 113, her vil du få rettleiing og hjelp.
Person med pustevanskar som klarer å snakke og hoste:
Oppmod personen til å hoste. Dette er mest effektivt.
Person som ikkje klarer å snakke eller hoste fordi luftvegane er blokkerte:
Barn over eitt år og vaksne:
- Stå bak personen og hald rundt vedkommande.
- Bøy hovudet til personen framover.
- Veksle mellom å gi 5 kraftige slag midt mellom skulderblada på ryggen følgt av 5 kraftige støyt øvst i magen (Heimlichs manøver).
Bilete: Science Photo Library, NTB scanpix / CC BY-NC-SA 4.0
Barn under eitt år:
- Legg barnet langs låret ditt og hald hovudet lågt. Hald ei hand under brystet på barnet og ei hand på ryggen til barnet. Dette gjer det enklare å snu barnet.
- Veksle mellom 5 slag midt mellom skulderblada og 5 brystkompresjonar.
Person som er eller blir medvitslaus:
Start hjarte- og lungeredning med 30 kompresjonar følgde av 2 innblåsingar (30:2). Sjå raskt etter framandlekamen i munnen før kvar innblåsing.
Vær alltid forsiktig når du skal prøve å fjerne framandlekamen frå munnhòla. Det er lett å skyve framandlekamen lenger ned.
Følg instruksjonane for hjarte- og lungeredning.
Viss du er åleine – Heimlichs manøver gjennomført på deg sjølv:
- Knyt hendene like over navlen.
- Gi deg sjølv kraftige støyt oppover magen.
- Len deg eventuelt over ein stolrygg for å oppnå det same.