Hjelp! DKS kjem på besøk!

Forslag 1: "Bruk eit ark"

Før besøket

1. Del ut eit blankt ark til elevane og be dei skrive tittelen på DKS-besøket.

2. Gi dei så 5 minutt til å skrive ned kva dei trur skal skje.

Etter besøket

1. Be elevane ringe rundt eit ord på arket som dei synest passar.

2. Gi dei ein post-it-lapp til å skrive ned det ordet dei har sett ring rundt.

3. Skriv tittelen midt på tavla og be elevane henge opp post-it-lappane sine rundt.

4. Start dialog.

Forslag 2: "Ta ein prat"

Før besøket

1. Sei tittelen på DKS-besøket og fortel elevane kva kunstuttrykk dei skal få oppleve.

2. Fortel ALT du veit om kunstuttrykket. Ver ærleg på at du ikkje veit noko meir.

3. Del elevane i grupper på fire og be dei snakke om kva dei sjølv veit om kunstuttrykket.

Etter besøket

1. La elevane igjen setje seg i grupper. Be dei svare på spørsmålet: Kva overraska oss?

2. Start klasseromsdialog.

Forslag 3: "Bruk tavla"

Før besøket

1. Skriv tittelen på DKS-besøket midt på tavla og lag eit assosiasjonskart saman med elevane.

2. LA STÅ!

Etter besøket

1. Observer tavla saman. Les høgt alle orda som står der.

2. Bli einige med elevane om fem av orda som kan relaterast til besøket. Diskuter kvifor.

3. Bruk dei fem orda i dialogen.

Forslag 1: "Kva handlar det om?"

Før besøket

1. Skaff informasjon om kunstnar/kunstverk saman med elevane. Du kan òg dele elevane inn i grupper og gi dei ulike oppdrag.

2. Oppsøk rommet der møtet skal skje saman med elevane. Aktiver forkunnskapar og visningar hos elevane om kva dei trur kjem til å skje.

3. Gi elevane konkrete oppdrag som dei skal sjå etter under sjølve besøket. Døme kan vere å leite etter lydar, karakterar, handlingar, kostyme, ansiktsuttrykk, teksturar, former, ting og kjensler. Somme av elevane kan prøve å legge merke til noko dei trur ingen andre ser.

Etter besøket

1. Lei ein samtale med utgangspunkt i følgande spørsmål:

   • Kva skjedde?

   • Kva såg du?

   • Kva la du merke til?

   • Kva høyrde du?

   • Kva tenkte du?

   • Kva følte du?

2. Prøv i fellesskap å finne ut av kva dette handla om.

3. Korleis kan tematikkane utforskast vidare i andre fag?

Forslag 2: "For ei kjensle!"

Før besøket

1. Vel to eller tre kjensler DKS-besøket omhandlar (til dømes forelsking, sjalusi, einsemd).

2. Be elevane utforske desse kjenslene med kroppane sine. Korleis ser ein person som er einsam/sjalu/forelska ut?

3. Vel ei av kjenslene. Be elevane stå i "frys" mens dei uttrykker kjensla. Etter 5 sekund seier du "skift". Elevane skal då finne eit anna kroppsleg uttrykk for den same kjensla. Sei "skift" igjen, og så vidare.

4. Start ein dialog om kjenslene de har utforska.

Etter besøket

1. Skriv opp tittelen på DKS-produksjonen og kjenslene de har utforska.

2. Individuelt: La elevane velje seg EI kjensle. Be dei skrive ned korleis denne kjensla kom til uttrykk under DKS-besøket. Døme: "Eg tenkte på einsemd då …" I grupper: La elevane som har valt lik kjensle få sitje saman. Elevane les opp setningane sine. Gruppa lagar fire nye setningar som definerer kjensla. Døme: "Einsemd er …" I plenum: Gruppene presenterer påstandane sine for klassen.

Forslag 3: "Ver konkret!"

Før besøket

1. Ta med deg konkrete gjenstandar som skal utforskast i forkant av besøket. Fortel om kva kunstuttrykk som kjem, men ikkje noko meir.

2. Lag grupper på 3–5 elevar. Del ut ein gjenstand til kvar av gruppene. La elevane utforske gjenstanden ved å aktivere sansane.

3. La dei utforske gjenstanden med tankane:

   • Kvar har eg sett slike før?

   • Kva blir han brukt til?

   • Av kven? Når? Korleis?

Be elevane diskutere: Kva kan gjenstanden ha med besøket å gjere?

Etter besøket

Be elevane om å kople DKS-opplevinga til gjenstanden ved å

• ta bilete av gjenstanden og skrive ned opplevinga si av DKS-besøket

• diskutere korleis gjenstanden kan sjåast på som symbol for kunstverket

• reflektere over kvifor kunstnarane valde å ha med denne gjenstanden (eller ikkje)

• fortelje att DKS-besøket gjennom perspektivet til gjenstanden

Forslag 1: "Kva har dette med oss å gjere?"

Før besøket

Utforsk saman med elevane:

1. Kvifor kjem DKS til oss?

2. Kva vil kunsten fortelje oss?

3. Korleis vil kunstnarane fortelje oss det?

4. Kvifor kjem vi til å synast at dette er interessant?

Etter besøket

Utforsk vidare saman med elevane:

1. Kva ville kunsten fortelje oss?

2. Kvifor handlar dette DKS-besøket om oss?

3. Ta kontakt med ein annan klasse som skal oppleve den same DKS-produksjonen. Oversikta ligg på dks.no. Møt dei på Zoom eller Teams. Fortel dei kvifor DKS-besøket passa så godt til akkurat dykk. Be dei om å gjere det same til ein annan klasse.

Forslag 2: "Anten, eller …"

Før besøket

Alternativ 1: Send brev til elevane i posten frå ein oppdikta karakter. Brevet skal innehalde triggerar som har med tematikken eller kunstforma til DKS-besøket å gjere.

Alternativ 2: Finn ein ekspert (på tematikken eller kunstuttrykket) i lokalmiljøet ditt som kan komme på besøk.

Etter besøket

Alternativ 1: Be elevane skrive ei melding av besøket som dei sender til den oppdikta karakteren.

Alternativ 2: Be elevane sende eit brev til eksperten der dei formulerer nokre tankar om måten tematikken blei behandla på i DKS-besøket.

Forslag 3: "Viss eg var ein annan"

Før besøket

1. Lat som om klassen er ei fiktiv gruppe (til dømes ein jury, ein sirkustrupp, ein hjelpeorganisasjon, fabrikkarbeidarar, vikingar eller liknande). La elevane lage seg fiktive karakterar som høyrer heime i denne fellesskapen.

2. La elevane utforske gruppa og dei fiktive karakterane på ulike måtar. Dei kan til dømes lage ein podkast, skrive dagbok, lage eit tv-program, ein plakat eller skissere eit oversiktskart.

Etter besøket

1. Be elevane omarbeide kunstuttrykket som om dei var den fiktive karakteren.

2. Korleis ville karakteren ha reagert?

3. Kva ville hen ha gitt av tilbakemeldingar?

4. La elevane utforske DKS-opplevinga som om dei var den fiktive karakteren. Dei kan til dømes skrive ei klage, ei melding eller lage ei nyheitssak.