Møbelsnikkar

Film: Henriksens snekkeri

I filmen under (lengde 3:03) blir vi med unge møbelsnikkarar på jobb og får sjå kor varierte arbeidsoppgåvene er.

Korleis jobbar ein møbelsnikkar?

Som møbelsnikkar jobbar du med skapande arbeidsprosessar. Du designar, teiknar og konstruerer, både for hand og ved hjelp av dataverktøy. Gjennom praktisk arbeid lærer du å bruke materiale, verktøy og maskiner og utviklar ferdigheiter i tradisjonelle og nyare handverksteknikkar. Kundane kan vere alt frå privatpersonar til offentlege verksemder. Møbelsnikkarar samarbeider ofte med møbeltapetserarar.

Film: Møbelsnekker

I denne filmen (lengde 2.57) fortel Kasper Sveen om arbeidet sitt som møbelsnikkar og om utdanningsvegen dit.

Eigenskapar

Ein møbelsnikkar bør vere kreativ og ha praktisk og estetisk sans. Du må like å skape med hendene, og dessutan å teikne og konstruere produkt. Det er viktig å både kunne jobbe sjølvstendig og i samarbeid med andre.

Utdanning

Utdanninga for å bli møbelsnikkar er to år i vidaregåande skule og to år i lære i ei møbelsnikkarbedrift. Det første året tek du Vg1 handverk, design og produktutvikling. Etterpå vel du Vg2 trearbeid. Fullført og bestått opplæring fører fram til sveinebrev. Yrkestittelen er møbelsnikkar.

Film: Gjenbruk i fokus

Ekteparet Thilde og Ole Rosén-Lystrup driv firmaet Drivved AS på Høvik i Bærum. Dei har spesialisert seg på å lage møblar av gamle materiale. I filmen nedanfor (lengde 4:47) følger vi Ole på jakt etter treverk, og vi ser korleis han løyser ei bestilling på eit bord med plate av gjenbrukte materiale.

Ole Rosén-Lystrup har vorte kjend gjennom arbeidet sitt i TV-serien Eventyrlig oppussing.