Det politiske arbeidet på LilleStortinget

Det er stort handlingsrom for LilleStortinget sine representantar som vil noko, husk berre på at du bør ha ryggdekning i partigruppa di, og pass på at du opptrer i samsvar med både med parlamentariske reglar og med LilleStortinget sine reglar.

Det politiske arbeidet går i stor grad føre seg i partigruppemøta og i komitemøta. Her kjem ei kort skildring om kva som skjer i dei ulike møta.

I partigruppa møter alle i partiet ditt. Her skal gruppa saman finne ut korleis de stiller dykk til dei ulike sakene som er til behandling i komiteane.

• Parlamentarisk leiar har ansvar for dette arbeidet og sørgjer for at partigruppa saman kjem fram til standpunkt som er i samsvar med politikken til partiet.
• Det er vanleg at regjeringspartia støttar alle forslag som kjem frå Regjeringa.
• I partigruppa bør ein gjennomgå alle proposisjonane og representantforslaga og ta stilling til kva partigruppa skal meine, og dermed komme fram til standpunkt og prioritere viktigheita av sakene som kan fremjast i komitemøta.
• Sørg for at du veit korleis du skal stemme i kvar einaste sak når sakene skal til votering på fredagen. Dette blir gjennomgått i siste partigruppemøte før plenumsdebatten.

I komiteane går LilleStortinget si behandling av proposisjonar og representantforslag føre seg. Her skjer dei politiske diskusjonane partia imellom, og det blir kartlagt kven som støttar og kven som går i mot sakene som er til behandling.

• Hovudoppgåva til komiteane er å behandle proposisjonane dei har fått frå "departementet" sitt og utarbeide ferdigeinnstillingar som det skal voterast over i salen på LilleStortinget.
• Det er ansvaret til alle komitemedlemmane at dei har avklart med partigruppa si korleis dei skal stille seg til dei sakene som er til behandling.
• Dersom komiteen deler seg i ei sak, skal mindretalet utpeike 1–2 personar som skal utdjupe kvifor dei går i mot forslaget. Desse skal framføre mindretalet sittsynspunkt under plenumsdebatten.
• Fleirtalet skal utpeike 1–2 personar som skal utdjupe kvifor dei støttar forslaget. Desse skal framføre synspunkta til fleirtalet under plenumsdebatten.
• Under desse saksinnlegga kan andre representantar delta i debatten.
• Oppgåva til komiteleiaren er å sørgje for at alle saker blir behandla og at det blir skrive ei innstilling for kvar sak.

Innstillinga frå komiteen viser korleis medlemmane i komiteen stiller seg til ein stortingsproposisjon eller eit representantforslag.

• Dersom alle partia er samde i ei sak, må det komme fram av innstillinga.
• Er komiteen delt, skal innstillinga vise kva parti som representerer fleirtalet, og kva parti som representerer mindretalet/mindretala. Mindretalet sitt forslag blir alltid først skrive.
• Av og til kan komitemedlemmane i fellesskap endre på teksten i forslaga for å skaffe eit breitt fleirtal. Viss dette blir gjort, må det òg komme fram på komiteinnstillingane.
• Alle innstillingane skal leverast til Presidentskapet av komiteleiaren innan fristen (sjå programmet til skulen).