Fag
No som de har sett dykk inn i hendingane frå 22. juli 2011 og fram til dommen mot Breivik, kan de fordjupe dykk i temaet ved å jobbe med dette prosjektet.
Du er no på siste steget i læringsstien 22. juli 2011
Gå til faget: Tverrfaglege tema
Gå til emne: 22. juli 2011
Dette prosjektet består av tre fasar:
Gruppearbeid: Gruppene fordjupar seg i ulike emne.
Deling: Gruppene deler det dei har funne ut, med klassen.
Individuelt arbeid: Kvar elev skriv eit oppsummerande refleksjonsnotat.
I refleksjonsnotatet skal de bruke det de har lært i gruppearbeidet og av dei andre gruppene, slik at de kan svare på nokre sentrale spørsmål om 22. juli.
Gjennom prosjektet skal de søkje etter svar på desse seks hovudspørsmåla:
Kvifor blei nettopp regjeringskvartalet og Utøya angripne?
Korleis takla Noreg krisa?
Kva blei konsekvensane av terrorangrepet?
Korleis kunne eit slikt angrep skje?
Korleis kan vi hindre at noko liknande skjer igjen?
Korleis påverkar terror og ekstremisme politisk deltaking?
Jobb i grupper på 2–4 elevar og fordel ulike fordjupingsemne mellom gruppene. De finn forslag til fordjupingsemne under.
Kvar gruppe skal setje seg inn i fordjupingsemnet sitt og prøve å svare på hovudspørsmåla over, ut frå den faglege innfallsvinkelen de har valt.
Ver merksam på at ikkje alle fordjupingsemna kastar lys over alle hovudspørsmåla. I nokre tilfelle vil eit fordjupingsemne kanskje berre belyse to eller tre spørsmål.
Gruppene skal dele det dei har funne ut, med klassen. De kan til dømes førebu ein kort presentasjon og skrive ein kort tekst som oppsummerer det de har funne ut.
Til slutt skriv alle eit individuelt refleksjonsnotat. I notatet skal de prøve å svare på dei seks hovudspørsmåla. Det er viktig at de får fram kva det samla arbeidet i klassen har vist av breidda og kompleksiteten i spørsmåla.