Fagstoff

Finihte verbi bïjre

Daelie edtjh finihte verbe-hammoej bïjre lïeredh. Datne lïerh mah dah, jïh guktie dejtie nuhtjedh.

Finihte verbh

Finihte verbe-hammoeh leah gosse mijjieh verbide sojjehtibie.

Finihte verbi sojjehtimmie-hammoeh:

Moduse:
indikatijve jïh imperatijve
Tïjje:
presense jïh preteritume
Persovne:
1., 2. jïh 3. persovne
Taale:
akten-taale, göökten-taale jïh gellien-taale

Modush

Moduse soptseste guktie soptsestæjjan sijjie dïsse mïsse soptseste. Åarjelsaemien-gïelen göökte modush.

Indikatijve

Indikatijve lea dïhte sïejhme nöytraale vuekie maam akt jiehtedh. Soptseste dam mij lea vihtie, maam gie dorje, mij sjædta jallh heannede. Verbh mah indikatijvesne, dah persovne-minngiegietjieh utnieh. Dah jïjnjemes raajesh indikatijve modusisnie.

Dah guaktah jååktan böötigan.

Moduse: indikatijve
Tïjje: preteritume
Persovne: 3. persovne
Taale: göökten-taale

Imperatijve

Imperatijve lea gåessie mijjieh gïem jallh gïeh stillebe maam akt darjodh. Golme imperatijve-hammoeh gååvnesieh; gosse aktem, gööktesh jallh jienebh stilledh.

Båetede diekie.

Moduse: imperatijve
Dejtie mejtie stillebe: gallesh
Taale: gellien-taale