Guktie argumenteeredh?
Guktie argumenteeredh
Vihkielommes argumentereles teekstine lea argumentasjovne. Aajkoe lea dåastojem baajnehtidh. Gellien aejkien tjoerh gellie ovmessie argumenth nuhtjedh guktie aajkoem jaksedh.
Ryöktesth jïh gaahpoeh argumenth
Argumentasjovne mij åehpies daejremen mietie jïh maam maehtebe vuarjasjidh, lea gaahpoeh jallh ryöktesth argumentasjovne. Daejremevoeten teekstine daate argumentasjovne aelhkie guarkedh jïh vihkielommes juktie krïevebe argumenth edtjieh eensi jïh tjïelke årrodh.
Ov-ryöktesth jïh tjeakoes argumenth
Mijjieh jeenjemes gyhtjelassh digkiedibie. Akte gyhtjelasse vuesiehtimmien gaavhtan ovjuvre-politihke. Mijjieh maehtebe vierhtieh, vuajnoeh jïh aaj daejremem digkiedidh.
Dannasinie seedtije tjuara dovne jiermiem jïh vaajmoem baajnehtidh, appelleeredh. Seedtije sæjhta dov domtesh baajnehtidh. Ij leah man aelhkie tjeakoes argumenth vueptiestidh. Maehtebe seedtijen argumenth goerehtidh daejnie gyhtjelassigujmie:
- seedtije sæjhta domtesh baajnehtidh?
- mah gïeleldh vierhkie-vierhtieh seedtije nuhtjie?
- maam seedtije jeahta/tjaala guktie dåastoje edtja dïsse jaehkedh?
Dam maam jeahta tjuara aaj maehtele jïh saatnan årrodh guktie mubpieh edtjieh satnem goltelidh jïh jaehkedh.
Logose, etose jïh patose
Dah greekeladtjh mïelin håaloje sov goltelæjjah baajnehte golme vuekine. Dah golme appelle-hammoeh dah gåhtjoejin logosinie, etosinie jïh patosinie. Logose-appelle lea gaahpoeh argumentasjovne, faakta-argumenth mejtie håaloje buakta. Etose jïh patose leah appelle-hammoeh mah tjeakosne: Etose jis håalojem jaehkebe, jïh patose domtesh mah håaloje sov goltelæjjide gååske jïh mïelide appelleerede. Aelhkebe vuekine maehtebe jiehtedh, etose jïh patose ektesne tjeakoes argumentasjovne.