Ovmessie faage-gïelh

Faage-gïelh jïh terminologijh

Almetjh joekehts faage-gïelh jïh faage-baakoeh evtiedamme juktie buektiehtidh sinsitnine barkedh ovmessie faagigujmie, faagi bïjre soptsestalledh jïh guarkadidh. Gellie sjïere faage-gïelh evtiedamme dovletjistie, goh båatsoen jïh göölemen bïjre, jïh daaletjasse, goh industrijen jïh ekonomijen bïjre.

Daan biejjien jïjnjh faage-dïejvesh, jallh terminologijh, ammes gïelijste båetieh. Orrebh faage-gïelh gellien aejkien gaske-nasjonaale gïeline sjïdteme. Stoere seabradahkesne daaroen-gïele guhkiem åvtanamme juktie maehtebe daaletje jïh orre aamhtesi bïjre soptsestidh. Åarjel-saemien gïele ij seamma gåhkese båateme. Saemien-gïelesne jïjnjh baakoeh annje fååtesieh juktie mijjieh buektiehtidh gaajhken bïjre aelhkieslaakan soptsestidh daaletje seabradahkesne.

Dan åvteste geervebe faagi- jïh teemajgujmie barkedh saemien-gïelesne, dovne barkoe-faageles ööhpehtimmie-programmesne jïh studije-ryöjreden ööhpehtimmie-programmesne.