Lohkije-teekste
Doh jeanatjommes lohkije-teeksth leah digkiedimmie-lahtesh, amma åenehks argumentereles teeksth aktine tjïelke veanhtojne, man åssjele lea lohkijem jaehkiehtidh. Men maehtebe aaj teeksth tjaeledh mah uvtemes edtjieh bievnedh:
Vuesiehtimmien gaavhtan, Saemien Sijte maahta bievnedh akten prosjekten bïjre, jallh akte privaate almetje maahta akten konserten bïjre tjaeledh mesnie satne orreme.
Ij leah naan byjjes njoelkedassh guktie akte lohkije-teeksteedtja vååjnedh, men jis sïjhth gellie lohkijh jaksedh, dellie dov teekste byöroe aktelaaketje årrodh. Tjaelieh dan åvteste åenehks jïh tjyölkehke, jïh ajve akten aamhtesen bïjre.
Aktene lohkije-teekstesne datne dov persovneles vuajnojne båatah, desnie dov åssjaldahkh jïh domtesh tjaalah. Dov lea luhpie aatide ånnetji gïeregen nïlle bïejedh, jïh maahtah maaje ånnetji striengkies årrodh jis tuhtjh daerpies. Ih byörh almetjh håasedh, jïh tjoerh ajve rïektesem tjaeledh.
Akte teekste nedtesne jallh paehpere-plaeresne tjuara lohkijen tsåatskelesvoeten bïjre gaahtjedh jïjnjh jeatjah teekstigujmie. Dan åvteste vihkeles datne buektehth lohkijen ïedtjem feengkedh guktie sæjhta dam lohkedh. Nuhtjh gïelem juktie domtesh gåaskodh, jïh tjaelieh naemhtie guktie lohkije datnem, tjaelijem laajhta.