Oppgåver om normer, verdiar og haldningar

Oppgåve 1. Doping

Therese Johaug er ein tidlegare norsk skiløpar. I 2016 blei ho dømd til utestenging i 18 månader for doping etter å ha fått ein leppekrem, som var forboden, av legen på landslaget. Lance Armstrong vann VM og Tour de France sju gonger før han blei teken i den største dopingskandalen i sykkelsporten. Han innrømde seinare å ha dopa seg bevisst og systematisk for å vinne.

• Sjå pressekonferansen med Therese Johaug etter dopingavsløringa (lengde 2:07).

• Les artikkelen eller sjå videoen Lance Armstrong innrømmet doping hos Oprah på NRK.

• Samanlikn haldningane, verdiane og normene i dopingsaka til Therese Johaug med dopingsaka til Lance Armstrong (eller ein annan idrettsutøvar som er teken i doping.) Kva er forskjellane og likskapane?

Oppgåve 2 Når er noko rett og gale?

1. Diskuter følgjande handlingar med sidemannen. Når kan det vere gale, og når kan det vere rett

   • å slåst

   • å jukse

   • å hemne seg

   • å drepe

   • å ikkje gjere noko

   • å vere ulydig

   • å slå eit barn

   • å stele

   • å ikkje vite

   • å vere først

   • å snakke

   • å lytte

   • å gøyme seg?

   (Brenifier, s. 30)

2. Finst det noko fasitsvar i etikken? Kan du komme på nokon konkrete døme på handlingar som alltid er galne, uavhengig av tid, stad og omstende?

Oppgåve 3 Kvifor forandrar etikken seg?

Kvifor forandrar etikken seg? Ta gjerne utgangspunkt i konkrete døme. Diskuter dette med ein medlev.

Sjå deretter filmen med Melsom og Moen (lengde 3:02) og samanlikn det med ditt eige svar.