Forelesing og presentasjon

Sirkulasjon i brønnen (boresimulator)

Bli kjend med kontrollpanelet som blir brukt under boring og sirkulering av væsker. Du skal observere friksjonstrykket etter kvart som vi endrar på væskestraumen og væskefarten.

Tre elevar og ein lærear står omkring eit drillers panel. Foto. — Boresimulator. Bilete: Stavanger Offshore Tekniske skole (SOTS) / CC BY-SA 4.0

Sentralt i emnet

klargjering av manifold og ventilar
trykket i botnen av brønnen når returen blir teken ut gjennom chokeline
sirkulasjonstrykk = friksjonstrykk

Øvinga i hovudtrekk

Når vi borar, må vi alltid sirkulere væske i brønnen. Derfor skal du først klargjere overflateutstyret for sirkulasjon. Når du startar pumpene, blir væske sirkulert innvendig i borerøyra, ned i brønnen, ut i ringrommet og opp til slambehandlingsutstyret på overflata.

Denne øvinga handlar om å starte sirkulasjon riktig, lese av trykk, omdirigere returen gjennom BOP-en og observere korleis trykket utviklar seg når vi tek returen ut gjennom chokeline.

Kvifor skal vi trene på å sirkulere i brønnen?

Alt utstyr skal vere kopla riktig før vi startar pumpene. Om ikkje kan vi risikere å pumpe væska ut på dekk eller ut i havet. Dersom du startar pumpene og ein ventil er stengd, blir det utløyst ei sikring i pumpa som stoppar han. Då må sikringa tilbakestillast.

Vi skal òg kunne kople om returen frå flowline til chokeline på rett måte. Det treng vi dersom vi får eit kick inn i brønnen.

Testing av sirkulasjonstrykket (friksjonstrykket) blir kalla SCR – slow circulating rate test. Friksjonstrykket blir brukt dersom vi har fått eit kick inn i brønnen som skal sirkulerast ut.

Friksjonstrykket som oppstår i chokeline, verkar på botnen i brønnen og blir brukt som hjelp til å halde konstant botnholstrykk i samband med utsirkulering av kick.

Klargjering av sirkulasjonssløyfa

Sirkulasjonssløyfa går frå pumpene til standpipe manifold, til top drive, inn i borestrengen, ut gjennom dysene i borekrona, ut i ringrommet (brønnen) og opp til returlinja på overflata.

Når vi skal klargjere for sirkulasjon, må vi setje ventilane på standpipemanifolden i rett posisjon og passe på at ventilane i BOP-en står i open posisjon slik at det er ope frå pumpa til brønnen og frå ringrommet til overflateutstyret.

Trykkavlesing

Først finn du eit måleinstrument på drillers panel som viser leveringstrykk i systemet, og eit måleinstrument som viser returtrykket. Trykket på leveringssida kan målast ved pumpene, i standpipe manifold og i top-drive-overgangen til borerøyra.

Når BOP-en blir stengd rundt borestrengen, må vi opne chokeline-ventilane slik at returen kjem til overflata gjennom chokemanifolden. Målepunktet for returtrykk ligg i chokeline føre chokeventilen. Det betyr at vi kan måle kor mykje trykk som oppstår når vi strupar innvendig i choken.

Når du skal samanlikne trykkutvikling i ulike situasjonar, er det viktig at du vel eitt avlesingspunkt for leveringstrykket (drillpipe pressure) og eitt for returtrykket (casing pressure) og bruker det same under heile øvinga.

Simulatorøving – måling av friksjonstrykk

Øvinga kan skrivast ut frå dette dokumentet:

Simulatorøving om sirkulasjon og friksjon

Relatert innhald

Oppgåver og aktivitetar

Drillers metode på boresimulator

I dette arbeidsoppdraget får du øve på å bruke "drillers metode".