Fotografer kontrastar i nærmiljøet
Tema: arkitektur i nærområdet ditt.
Fotografer arkitektur eller interiør som viser kontrastar.
Gå tett på motivet og ta nært utsnitt.
Finn minst eitt motiv med kvar av desse kontrastane:
fargekontrast
formkontrast
storleikskontrast
teksturkontrast
materialkontrast
Alle komposisjonar bør ha kontrastar for å skape liv og merksemd. Store skilnader skaper store kontrastar, liv og spenning. Små kontrastar gir eit rolegare uttrykk.
Fargekontrast
Du kan skape kontrastar mellom fargar som til dømes er varme og kalde, sterke og svake eller lyse og mørke.
Formkontrast
Du kan skape kontrastar mellom ulike former. Til dømes mellom ein sirkel og ein trekant, ei organisk og ei geometrisk form, ei høg og ei låg form, eller ei spiss og ei rund form.
Storleikskontrast
Kontrast mellom storleikar kan framheve gjenstandar. Du kan bruke ulike storleikar medvite for å overdrive noko.
Teksturkontrast
Overflater kan kjennast rue, glatte, mjuke, harde, ruglete, lodne, kalde eller varme. Du kan setje saman ulike teksturar for å skape spenning og heilskap.
Materialkontrast
Når du set saman fleire ulike materiale, blir det skapt kontrastar mellom dei ulike materiala.
Relatert innhald
Ordet kontrast betyr «motsetnad» eller «forskjell». Store kontrastar skaper spenning, og små kontrastar skaper harmoni.
Bruk av kontrastar påverkar korleis vi opplever farge og form. Ved å bruke fargekontrastar bevisst kan du forsterke det uttrykket du ønskjer.