Bokbretting og form
Du treng ei eller fleire kasserte bøker.
Det finst ulike teknikkar innan bokbretting som du kan bruke for å skape tredimensjonal form. Søk på "book art", og følg ei oppskrift. Bruk gjerne ei bok til å teste ut ulike teknikkar.
Dokumenter prosessen frå start til ferdig produkt. Presenter ved hjelp av bilete og fagord i ei digital forteljing.
Vil du utfordre deg sjølv, kan du òg lage eit eige design. Då dokumenterer du framgangsmåten steg for steg som ei oppskrift.
Formforståing
Evna di til å sjå og vurdere form påverkar kvaliteten på arbeidet ditt. I denne oppgåva skaper du tredimensjonal form med utgangspunkt i ei bok. Du skal altså skape ei form som har utstrekning både i lengde, breidde og høgde.
Nøyaktig arbeid
Å vere nøyaktig, uthaldande og tolmodig er viktige eigenskapar i alle profesjonelle samanhengar. I denne oppgåva trener du opp desse eigenskapane. Forma du skaper, skal vere godt utforma og nøyaktig laga.
Formuttrykk
Form påverkar oss. Farge kan opplevast med auga, men vi vil gjerne både sjå og ta på ei form. Alle former uttrykker noko. Vi snakkar om formspråk eller formuttrykk når vi beskriv korleis former ser ut. Når vi vurderer estetiske uttrykk som harmoni, skjønnheit og balanse, bruker vi sansane våre.
Estetisk kvalitet
Både form og farge blir påverka av trendar. Ofte er marknadsføringa like viktig som produktet, men det finst design som er like populære i dag som då produkta kom på marknaden. God estetisk kvalitet opplever vi som vakkert gjennom sansane våre.
Digital forteljing er ei kort (2–5 minutt) multimedieforteljing, og ho består vanlegvis av eit lydspor (som oftast er det lese inn av forteljaren sjølv), tekst, illustrerande bilete (bruk eigne bilete) og nokre gonger illustrasjonar, teikningar, animasjonar og/eller video.
Du skal bruke fagord når du dokumenterer. Bruk gjerne skriveverktøyet til å skape ei god oppbygging av innhaldet.
Tittel, namn og produktfoto | |
|---|---|
Innleiing | Beskriv med eigne ord kva oppgåva går ut på. |
Hovuddel | Her dokumenterer du prosessen din, frå idé til ferdig produkt. Hugs foto og fagord. |
Beskriv formuttrykk | Kva grunnform valde du å ta utgangspunkt i, og kvifor valde du denne forma? Er forma addert eller subtrahert? Er forma geometrisk eller organisk? Er uttrykket forenkla, stilisert eller abstrahert? Er forma lett eller tung, open eller lukka? |
Teknikk | Dersom du laget ditt eige design, korleis jobba du med idéutvikling? Kva teknikkar brukte du? Forklar kvifor du brukte dei teknikkane. |
Materiale | Kva materiale jobba du med? På kva måte er dette materialet berekraftig? Kvifor er det bra for miljøet med gjenbruk? |
Handverk og kvalitet | Vurder dei estetiske kvalitetane ved produktet ditt. Er forma godt forma ut, og er ho god å sjå på? Kvifor er ho det? Har du jobba nøyaktig? Korleis er handverket utført? |
Avslutning | |
Arbeidsprosess | Gjorde du nokre erfaringar undervegs som gjorde at du måtte endre planen din? Det kan til dømes vere endringar i framgangsmåte, teknikk eller måten du utførte handverket på. |
Vurder arbeidet ditt | Korleis vart produktet ditt i forhold til idéen din? Korleis har du utført arbeidet? Kva er grunnen til at du er fornøgd eller ikkje fornøgd med produktet ditt? Kva kunne du gjort annleis i arbeidet med produktet ditt? Kva er grunnen til at du vart ferdig med alt innan fristen? Kva har du lært i denne prosessen? |
Filer
Relatert innhald
Vi snakkar om formspråk eller formuttrykk når vi beskriv korleis former ser ut. Her skal vi sjå på fagomgrep innan to- og tredimensjonal form.
I handverksfag kan du bli beden om å vurdere estetisk uttrykk. Men kva betyr eigentleg det?