Megatrendar
Kva meiner vi med megatrend?
Når vi snakkar om trendar, dekker omgrepet oftast mindre åtferdsendringar som er meir interessante for dei som skal utvikle nye produkt, enn for dei som ønsker å analysere dei store endringane i samfunnet. Ein megatrend blir forklart av John Naisbitt som "store sosiale, økonomiske, politiske og teknologiske endringar som skjer sakte, men sikkert".
Trendforsking
John Naisbitt er ein av dei fremste trendforskarane i verda. Saman med Patricia Aburdene har han skrive bøkene Megatrends og Megatrends 2000. I 1982 beskreiv dei ti megatrendar som dei meinte ville påverke oss i eit hundreårsperspektiv:
- frå det industrielle samfunnet – til informasjonssamfunnet
frå tvungen teknologi – til høgteknologi / high-touch
- frå nasjonalt basert økonomi – til verdsbasert økonomi
- frå kort tidsperspektiv – til langt tidsperspektiv
- frå sentralisering – til desentralisering
- frå institusjonell hjelp – til sjølvhjelp
- frå representativt demokrati – til deltakardemokrati
- frå hierarki – til nettverkssamarbeid
- frå "nord" – til "sør"
- frå anten-eller – til fleire moglegheiter
Megatrendar og utvikling
Fleire av desse megatrendane er relevante når vi analyserer utviklinga. I teknologisk samanheng er det veldig lenge sidan 1982. Samtidig er det lett å sjå at John Naisbitt og Patricia Aburdene trefte godt då dei beskreiv mykje av det som allereie kjenneteiknar dei viktigaste trendane i dag.