Brannteori

Branntrekanten

Desse tre elementa må vere til stades for at det skal oppstå ein brann:

• brennbart materiale
• tilstrekkeleg varme

• nok tilgang på oksygen

Brannforløp

Eit brannforløp kan delast inn i tre fasar:

• brannutvikling

• fullt utvikla brann

• avkjøling

Ved temperaturar på cirka 600 °C tek dei brennbare gassane i eit brannrom fyr, og vi får det som blir kalla overtenning. Illustrasjonen ovanfor viser eit vanleg brannforløp med overtenning og moglege brannforløp utan overtenning.

Ein brann startar med ei påtenning, ofte som følge av feil på eit elektrisk anlegg. Kor lang tid det tek før brannen får overtenning og blir ein fullt utvikla brann, er avhengig av tilgangen på brennbart materiale og oksygen. Ofte varer brannutviklingsfasen i 5–10 minutt.

Hugs å tenke på eigen tryggleik og tryggleiken til andre, og sørg for at de kjem dykk i tryggleik i god tid før bygningen eventuelt blir overtent. Fullt utvikla brann er ein jobb for brannvesenet.

Det er i starten av brannutviklingsfasen vi sjølve kan prøve å sløkke brannen. I den relaterte artikkelen kan du lese meir om korleis du kan sløkke små brannar.