Oppgåve

Loddestativ

Når du skal lodde saman to leidningar, kan det vere vanskeleg å halde leidningane samtidig som du held loddebolt og loddetinn. Kvifor ikkje lage eit stativ som kan hjelpe deg?

Grønt og svart stativ med to tårn som held to leidningar saman. Foto. — Dette stativet er godt eigna til å halde leidningane dine ved lodding. Klarer du å lage ditt eige?

Kva er eit loddestativ?

Ved lodding er det viktig at det du loddar, held seg stabilt saman, slik at du kan varme opp materialet og loddetinnet og dermed får ei solid lodding.

Dette krev i utgangspunktet mange hender, men eit stativ som held det som skal loddast, fast i rett posisjon, hjelper deg.

Loddestativ kjem i mange ulike utformingar, frå stativ med mange ledd og krokodilleklemmer til NDLAs 3D-printa versjon med fjørbelasta kjevar.

Tenk over

Kan utforminga av kjeftane og avstanden mellom dei to tårna bli forandra?
Kan du lage din eigen versjon som er spesialtilpassa bruken din?
Kan du lage ein versjon som har justerbar avstand mellom tårna?

Døme

Stativ som held ein raud loddebolt. Det har eit forstørringsglas på ein bevegeleg arm og to armar med klemmer på. Foto. — Dette er ein loddestasjon med både stativ, forstørringsglas og haldar for loddebolt. Treng det å vere så avansert?

Stativ med to tårn som held ein leidning. Det er ei fjør i tårnet som klemmer leidningen. Foto. — Ser du fjøra som er montert for å klemme leidningen?

Grønt og svart stativ med ei klemme øvst. Foto. — Detaljbilete av loddestativ. Kor mange delar trur du dette stativet består av?

Val av materiale

Du kan sjølv velje kva materiale du vil 3D-printe i. Vi valde denne gongen ABS-GF og ABS.

Spole med lysegrønt filament til 3D-printing. Foto. — Filament for 3D-skrivar. Kva farge vel du?

Du kan òg setje ditt personlege preg på stativet ved å velje dine eigne fargar.

Plassering på printplate

For å få eit godt resultat må du gjere nokre val knytte til plassering av dei ulike komponentane på plata til 3D-skrivaren i designprogrammet.

Vi valde følgande løysing:

Skriv ut "tårn" liggande på rygg med foten opp, utan support.
Skriv ut basen med rommet oppover, med support i dei rektangulære opningane i rommet og dessutan i hola mot papirplata.
Skriv ut armane med kjeften oppover utan support.
Skriv ut lokket med låseklipsa oppover utan support.

Sjekk tekniske data for 3D-skrivaren din for tilrådde innstillingar for sjølve utskrivinga.

Grå plate med fire grøne mekaniske komponentar med ulik avansert fasong. Illustrasjon. — Her ser du forslag til korleis du kan plassere dei ulike komponentane på printplata til 3D-skrivaren.

Maskinvare

For å kunne montere saman dei ulike delane og få rett funksjon brukte vi følgande delar:

Mange sylinderforma delar med riller på utsida og gjenge inni ligg på ei plate. Foto. — Desse gjengeinnsatsane er godt eigna til å bli brukte i 3D-printa delar, som mutterar. Dei festar seg i plasten.

4 stk. M5x10 panhead skruar
2 stk. M4x20 panhead skruar (kan erstattast av unbrako eller sekskant, bruk gjerne skive)
4 stk. M3x20 panhead skruar (kan erstattast av unbrako eller sekskant, bruk gjerne skive)
4 stk. M5 gjengeinnsatsar
2 stk. M4 gjengeinnsatsar
4 stk. M3 gjengeinnsatsar
2 stk. fjører. Her kan du velje dimensjon og styrke, men vi valde fjør med følgande spesifikasjonar:
- fjørtråd: 0,8 mm
- fjørdiameter: 8,8 mm
- største avslappa lengde: 42 mm

Det kan nok brukast andre delar, og ved modifikasjon av teikningane må du tilpasse delelista etter eige ønske.

Fyll rommet i sjølve foten med noko tungt for å få betre stabilitet. Vi brukte ei rustfri plate på 98 x 48 x 5 mm.

Arbeidsteikning og 3D-teikning

Ei enkel arbeidsteikning for dette læringsoppdraget ligg lagd ved som ei PDF-fil, og du kan skrive ho ut, viss du ønsker. Det ligg òg ferdige filer for utskriving av delane på ein 3D-skrivar, i form av STL-filer.

I tillegg ligg det vedlagt ei 3D-fil av delen. Ho kan opnast i eit CAD-program, som Autodesk Fusion 360. Denne fila er i formatet STEP. Med denne fila kan du modifisere modellen vår og gjere han til din eigen.

Oppgåvebank