Før, under og etter varme arbeid

Sikkerheitsforskrifta for varme arbeid

Varme arbeid er ei av dei vanlegaste årsakene til brann i bygg og industri. Derfor beskriv sikkerheitsforskrifta for varme arbeid nøyaktig kva tiltak som må gjennomførast for å forhindre brann og eksplosjon. Ho stiller krav til både arbeidsgivar, utførande og brannvakt, og ho krev dokumentasjon på at sikkerheita er vareteken.

Før arbeidet startar

Før oppstart skal det bli utført ei risikovurdering der moglege farar blir kartlagde og risiko blir redusert. Arbeidsinstruksen fungerer som sjekkliste, løyve og dokumentasjon for at sikkerheita er vareteken.

Samarbeid og plikter

Oppdragsgivar skal informere om farar på staden, mens oppdragstakar må vurdere arbeidsmetode, utstyr og tiltak. Oppdragstakar er den profesjonelle parten og har hovudansvar for sikker gjennomføring.

Viktige avklaringar før start:

• Kven stiller med brannvakt og sløkkeutstyr?

• Er det behov for tildekking av brennbart materiale?

• Må brannalarmanlegg koplast ut? Viss ja, kven gjer det?

• Har den som skal utføre arbeidet, gyldig sertifikat for varme arbeid?

• Er utstyret kontrollert og i orden?

Personleg verneutstyr (PVU)

Den som utfører varme arbeid, må bruke flammehemmande arbeidsklede, hanskar, hjelm, briller og høyrselsvern. Kleda skal vere reine og lukka og gi vern mot gneistar og varme gassar.

Kartlegging og gassmåling

Viss det er fare for lekkasje, eller viss det er brennbare materiale i nærleiken, skal det bli utført gassmåling før og under arbeidet. Holrom, sprekkar og lettennelege materiale må sikrast eller bli fjerna.

Førstehjelp og beredskap

Førstehjelpsutstyr og sløkkeutstyr skal alltid vere tilgjengeleg. Ved fare for brannskade er det viktig å ha høve til å kjøle ned huda med romtemperert vatn og å verne såret.

Ved CO-forgifting er det viktig å ha ein plan for korleis du kan flytte personen til frisk luft og gi førstehjelp.

Under arbeidet

Tiltak som er etablerte før start, må halde fram gjennom heile arbeidet. Dette gjeld spesielt overvaking, gassmåling og at brannvakt er til stades.

Brannvakt

Brannvakt er eit krav ved alle varme arbeid. Rolla inneber å overvake området, oppdage branntilløp og handle raskt ved fare.

Krav til brannvakt:

• gyldig sertifikat for varme arbeid

• namngitt i arbeidsinstruksen

• tydeleg merkt (refleksvest)

• skal ikkje utføre andre oppgåver

• må vere til stades i løpet av heile arbeidet og i pausar

Ved store eller uoversiktlege område kan det vere behov for fleire brannvakter.

Eksplosjonsfare

Der det kan leke brennbar gass, må det bli tekne gassmålingar jamleg. I tankar og lukka rom kan små mengder gass gi eksplosiv blanding. Arbeidet skal stoppast straks ved fare.

Etter arbeidet

Sjølv om flammen er sløkt, kan varme ligge igjen i konstruksjonar. Derfor er etterarbeid ein viktig del av sikkerheitsforskrifta.

Etterkontroll

Etter arbeidet skal

• brannvakt overvake området i minst éin time

• området blir kontrollert for varme og røyk

• brannalarmanlegg blir kopla inn igjen

• gassflasker blir sikra ved utgangar

• eventuelle hendingar blir dokumenterte

Internkontroll og dokumentasjon

Alle verksemder som utfører varme arbeid, skal ha eit HMS-system som oppfyller krava i internkontrollforskrifta. Arbeidsinstruksen fungerer som

• løyve til å utføre arbeidet

• risikovurdering og dokumentasjon

• sjekkliste over sikkerheitskrav

• avklaring av ansvar

Refleksjonsspørsmål

1. Kvifor må arbeidsinstruksen fyllast ut før varme arbeid startar?

2. Kva rolle har brannvakta under og etter arbeidet?

3. Korleis bidreg internkontrollforskrifta til tryggare arbeidsplassar?

4. Kvifor er etterkontroll viktig sjølv etter at flammen er sløkt?