Bruk av motorsag – arbeidsteknikk og sikkerheit

Sjå film på YouTube med foredrag av Skogbrukets HMS-utval om riktig og sikker hogst.

Bruk av motorsaga

Det er viktig å lære seg å bruke motorsaga på ein rett og sikker måte slik at vi unngår skadar og farlege situasjonar. Motorsaga er ein farleg arbeidsreiskap. Feil bruk kan utsetje både deg og andre for fare. Du skal bruke personleg verneutstyr, og verneutrustinga på saga skal vere i orden.

Under ser du kva dei ulike arbeidsoperasjonane felling, kvisting og kapping krev at du har kjennskap til.

• Felling:

  • kva du må planlegge
  • korleis du legg felleskjer
  • korleis du lagar hovudskjer
  • kva som er risikofaktorane
  • korleis du tek hand om sikkerheita

• Kvisting:

  • rett arbeidsteknikk
  • risikofaktorar
  • korleis du tek hand om sikkerheita

• Kapping:

  • kva risiko spenn i stokken utgjer
  • korleis du tek hand om sikkerheita

Øve, øve, øve

Du kan ikkje lese deg til korleis du bruker motorsaga. For å bli god må du øve. I starten skal du alltid vere saman med ein instruktør.

Kastfare

Ver merksam på kastfaren når du bruker motorsaga. Sagar du med øvre halvdelen av sverdspissen, får du slag på saga. Då løyser kjedebremsen seg ut og stoppar kjeda. MEN: Dersom du arbeider på ein måte som gjer at du får slaget rett mot deg, og avstanden mellom saga og til dømes hovudet er kort, treffer kjeda deg før kjedebremsen har stoppa kjeda.

Vurder risiko!

Fare for kast: når du bruker sverdspissen

Fastfelling: når treet blir hengande i andre tre

Spjerring: når stammen blir kløyvd på langs

Spenn: når du kappar stokk

Slitasje: når du har feil arbeidsstilling

Kjenner du sikkerheitsfunksjonane på saga? Har du det personlege verneutstyret ditt i orden?

Gå gjennom presentasjonen "Motorsag og tryggleik".

Fastfelling og spjerring

Det er stor risiko knytt til fastfelling og spjerring. Fastfelling vil seie at treet du feller, henger seg fast i andre tre og ikkje landar på bakken. Spjerring vil seie at trestammen sprekk på langs. Dette utgjer ein stor risiko for skade. Sjå Svante Hanssons film på YouTube og lær korleis du kan forhindre spjerring.