Slik byggjer du opp eit avsnitt

For å skape ein god struktur i hovuddelen er det lurt å starte kvart avsnitt med ei temasetning, altså ei setning som signaliserer for lesaren din kva avsnittet skal handle om. Eit døme er: "Eit verkemiddel som vert brukt i begge dikta, er metaforar." Når du skriv på denne måten, vil lesaren din skjønne kva avsnittet skal handle om, og du vert strengare med deg sjølv: "OK, no skal eg skrive om metaforar, og ikkje noko anna, i dette avsnittet." Så kan du sjølvsagt utdjupe litt etter temasetninga med setningar som: "Men medan metaforane i det første diktet er henta frå naturverda, er metaforane i det andre diktet frå bysfæren."

Når du peiker på eit verkemiddel i ein tekst, bør du alltid syne lesaren din kvar i teksten du har funne det. Trekk ut sitat frå teksten som syner bruk av kontrastar, metaforar, samanlikningar osv.

Avslutt avsnittet ditt med å vise kva funksjon verkemiddelet har i teksten. Funksjonen bør du alltid knyte til tematikken i diktet. Unngå vage formuleringar som: "Dette skal gjere diktet lettare å lese." Erstatt dei heller med meir presise utsegner, som til dømes: "Denne samanlikninga forsterkar inntrykket av at det lyriske eg-et kjenner seg framandt i byen."

Mykje av kunsten med å skrive gode analysar er å formidle både korleis forfattaren skriv og kvifor han eller ho skriv på denne måten, og det er dette du gjer når du avsluttar avsnittet ditt om verkemiddel med å skrive om funksjon.

I tillegg bør passe på at avsnittet ikkje blir hengjande i lause lufta: Sjå på temasetninga di og konkluder på ein måte som speglar henne. Er temasetninga til dømes: "Besjeling er eit verkemiddel som blir mykje brukt i diktet», kan ei fin sistesetning vere: «Besjelingane bidrar altså til å gi byen liv og framstille han som levande og munter."