Kameravinklar og perspektiv

Kameraet kan plasserast i ulike posisjonar i forhold til fokuspunktet i motivet. Kameravinkelen avgjer perspektivet i biletet, måten biletet gir att verkelegheita på.

Fugleperspektiv (1)

Kameraet er plassert svært høgt, og ein ser ovanfrå og ned mot fokuspunktet.

Overvinkla (2)

Kameraet er plassert høgare enn fokuspunktet.

Normalperspektiv (3)

Kameraet er plassert i normal augehøgde.

Undervinkla (4)

Kameraet er plassert lågare enn fokuspunktet.

Froskeperspektiv (5)

Kameraet er plassert svært lågt, og ein ser opp mot fokuspunktet.

Kameravinklar reflekterer maktforhold

Nokre personar ser vi opp til, andre ser vi ned på. Ein person som er fotografert i fugleperspektiv, verkar liten, svak og forsagt.

Vel vi eit undervinkla perspektiv, ser personen stor og mektig ut. Det er grunnen til at historiske portrett av statsoverhovud gjerne har vore noko undervinkla. I samfunn der det blir lagt vekt på likskapsideal, blir leiarar oftare framstilte i normalperspektiv.

Verda sett ovanfrå og nedanfrå

Har du tenkt over at høgda di bestemmer det perspektivet du har på omgivnadene? Det du ser ned på, har du ofte kontroll på. Kanskje kjenner du deg overlegen. Det som ragar over deg, kan verke både overveldande og skremmande og få deg til å kjenne deg liten og betydningslaus.

Barn og personar som sit i rullestol, lever med dette froskeperspektivet til dagleg. Det same gjer dei som sit og tigg på gata. Derfor kan det vere spennande å bevege kameraet ned på høgda deira. Korleis ser verda ut då?

Fugleperspektiv gir overblikk

På bilete tekne frå fly, helikopter eller kran ser vi motivet ovanfrå. Moderne droneteknologi gjer det i dag enkelt å ta bilete i fugleperspektiv. Slik kan fotografen gi oss eit overblikk over stader og hendingar sett frå lufta og rette merksemd mot problem vi elles ikkje ville ha fått med oss.