1940–1945: Komediar og lette underhaldningsfilmar

En herre med bart (1942)

Den norske politiske filmen var så å seie død i desse fem åra. Dette trass i at det NS-initierte Statens filmdirektorat, leia av Leif Sinding, kontrollerte både manuskripta, produksjonen og distribusjonen. Regissøren Walter Fyrst var ein einsam pådrivar for propagandafilmen. Han produserte nokre dokumentarfilmar, ei mengd korte vekerevyar og spelefilmen Unge Viljer (1942) innanfor denne kategorien.

Nokre av dei beste farsane i norsk film såg dagens lys i dei første åra av okkupasjonstida, som Hansen og Hansen (1941), Den forsvundne pølsemaker (1941), En herre med bart (1942) og Det æ’kke te å tru (1942). Salong- og sosietetskomediar gjorde Leif Juster, Per Aabel og Wenche Foss til evige namn på den norske stjernehimmelen.

Under okkupasjonsåra fekk norske myndigheiter auga opp for filmen som «ein veldig samfunnsfaktor» takka vere amerikansk, britisk og fransk dokumentarfilm i denne tida. Dette la ein del av grunnlaget for nasjonsbygginga i etterkrigstida.