Vurderingsressurs

Interaktivt innhald

Sertifisering i sikkerheit på naturfagrommet

Før de skal jobbe på naturfagrommet, må alle ha god kjennskap til sikkerheitsreglane, vite kvar sikkerheitsutstyr finst, og korleis det blir brukt, og kunne bruke sikkerheitsdatablad. Øv saman og ta sertifisering for å dokumentere at de har nødvendige ferdigheiter om sikkerheit på naturfagrommet.

Til læraren. Om sertifiseringsmetodikken

Sertifisering ved kvarandrevurdering

Sertifisering er ein effektiv måte å fremme kvarandrevurdering på og på den måten inkludere elevar i vurderingsarbeidet. I tillegg er kvarandrevurdering ein viktig naturvitskapleg praksis. I forsking blir både forskingsidéar og forskingsarbeid kvalitetssikra gjennom kvarandrevurdering (fagfellevurdering).

Forskarar er avhengige av å søke pengar til forskingsprosjekt. Dei som vurderer kven som skal få pengar, er fagfellar. Etter at eit prosjekt er gjennomført og ein vil dele funna med andre, må ein igjen gjennom ein runde med fagfellevurdering.

Les meir om fagfellevurdering på nettsidene til Berkeley universitet.

Gongen i sertifiseringa

Etter ei generell innføring der elevane blir kjende med det dei skal sertifiserast i, gjennomfører elevane ein ferdigheitsstige med eit valt tal trinn. Kvart trinn i denne stigen består av følgande element:

To og to øver saman og demonstrerer for kvarandre mens dei følger ei sjekkliste.
Når begge kjenner seg trygge på gjennomføringa, ber dei om å bli sertifiserte av ein annan som allereie er sertifisert på dette ferdigheitsnivået (for dei første elevane vil det vere ein lærar).
Viss eleven viser gode nok ferdigheiter, blir hen sertifisert og kan dermed vere med å sertifisere andre.
Når dei fleste er sertifiserte på første trinn, begynner dei å øve på neste.

Sertifiseringsprosessen er ein kjedereaksjon som blir starta ved at ein undervisar sertifiserer dei første elevane. Ingen får begynne på neste trinn før dei fleste er sertifiserte og det framleis er mogleg å halde folk i aktivitet som sertifisørar.

Det er viktig å setje av nok tid til praktisk øving.

Forslag til reglar

Det er ikkje lov å sertifisere øvingspartnar.
Dei som ikkje får godkjent gjennomføringa, må vente fem minutt før dei får prøve igjen.
Vurder å la dei som er sertifiserte, få bere eit merke som synleg bevis på at dei er godkjende og dermed kan bidra med å sertifisere andre. Bruk til dømes post-it-lappar. Ulike fargar kan symbolisere kva nivå i sertifiseringa ein er på.

Trinn 1. Sikkerheitsreglane på naturfagrommet

Bli kjent med sikkerheitsreglane

På dette trinnet skal du bli kjend med sikkerheitsreglane på naturfagrommet. Set deg inn i sikkerheitsreglane som du finn i dokumentet under.

Sikkerheitsreglar på naturfagsrommet frå Chesse.org(DOCX)

Øv

Bruk oppgåvene under for å øve på sikkerheitsreglane.

Flytt orda til rett plass i sikkerheitsreglane.

Situasjonar på naturfagrommet

Du jobbar på naturfagrommet. Kva vil du gjere i desse situasjonen? Vel alternativa som stemmer.

Bli sertifiserte

Ta testen om sikkerheitsreglane på naturfagrommet. Viss du får 75 % rett eller meir, vil du få godkjent resultat til å bli sertifisert på dette nivået.

Sikkerheitsreglar på naturfagsrommet(DOCX)

Trinn 2. Merking av kjemikal

Forstå kva faresymbol på emballasjen betyr

På dette trinnet skal du forstå kva faremerkinga på emballasjen til kjemikal betyr, og vise korleis du kan finne relevant informasjon på eit sikkerheitsdatablad.

Du kan forklare

kva fare står symbolet for
kort om faren

Du kan finne informasjon om kjemikal på det aktuelle sikkerheitsdatabladet ved å lese

faresetningar
sikkerheitssetningar
førstehjelpstiltak

Øv sjølv

Faresymbol

Kva betyr dei ulike faresymbola? Finn par.

Sikkerheitsdatablad

Kva kan du finne informasjon om på eit sikkerheitsdatablad? Flytt orda til dei rette boksane.

Bli kjend med sikkerheitsdatabladet

Klikk på punkta i sikkerheitsdatabladet under for å gjere deg kjend med kvar du finn den informasjonen du er på jakt etter.

Sikkerheitsdatablad som tekstdokument

Sikkerheitsdatablad(DOCX)

Øv med tilfeldig utdelt kjemikal

Jobb saman. Ein av dykk får delt ut eit kjemikal. Partnaren stiller spørsmål med utgangspunkt i sjekklista under.

Bli sertifisert

Bruk sjekklista under når de gjennomfører sertifiseringa.

Kjemikalsikkerheit(DOCX)

Trinn 3. Sikkerheitsutstyr og førstehjelp

Bli kjend med sikkerheitsutstyr og førstehjelp på naturfagrommet

Start med ein felles gjennomgang i klassen der de går gjennom sikkerheitsutstyret på naturfagrommet. Kvar finst det? Når skal det brukast? Korleis skal det brukast?

Aktuelle punkt:

rømmingsvegar
brannsløkkar
brannteppe
førstehjelpsutstyr
augeskyljeflaske
nøddusj
nødtoppar for elektrisitet

I tillegg kan de legge inn eit par døme på situasjonar som kan skje på eit naturfagrom. Vis og forklar kva ein gjer i desse situasjonane.

Døme på situasjonar:

syresøl på hud eller i auga
kuttskade i handa
brann i klede/hår
nokon svimar av

Øv saman

Etter felles gjennomgang kan to og to elevar øve saman. Bruk sjekklista under og øv og sjekk kvarandre. Når de føler at de er klare, ber de om å bli sertifiserte av læraren eller ein annan elev som allereie har fått godkjent dette trinnet.

Øv på førstehjelp med ein praterobot

Tips! For å øve på kva de skal gjere når det skjer uhell og det er behov for å gi førstehjelp, kan de bruke oppsettet til denne prateroboten eller lage dykkar eigen.

Uhell på naturfagrommet(JSON)

Bli sertifisert

Bruk sjekklista under når de gjennomfører sertifiseringa.

Sikkerheitsutstyr og førstehjelp(DOCX)