Skap den visuelle stilen i filmen

Produksjonsdesign handlar om å utforme og gjennomføre det visuelle konseptet i ein film. Det handlar om "show, don't tell" (vis, ikkje fortel). Eit bilete på veggen kan fortelje mykje om ein karakter. Det kan også den rotete stova. Produksjonsdesignaren jobbar med å skape den riktige visuelle stilen i ein film. Locations, dekorasjonar og kostyme er blant verkemidla.

"Tek du dei rette vala, kan du fortelje ei heil historie utan å seie eit ord", seier Fredrik Teige Skrattegaard, som studerer produksjonsdesign ved Den norske filmskulen på Lillehammer.