Evaluer med sokratisk metode

Den norske journalisten Berit Hedemann utvikla metoden då ho jobba med radiodokumentarar i NRK. Metoden kan brukast i arbeid med andre typar medieproduksjonar, og kan vere eit nyttig verktøy for å avdekkje kva som fungerer i ein produksjon, og kva som må jobbast vidare med.

Første del: Refleksjon i gruppe

1. Be ei lita gruppe menneske lytte eller sjå på medieproduksjonen din i fred og ro mens dei noterer opplevingar.
   
   Dei kan stille seg sjølve følgjande spørsmål:
   
   Rører produksjonen ved noko i meg?
   Klarer eg å følgje med, eller mistar eg interessa?
   Forstår eg bodskapen?
   

2. La gruppemedlemmene dele opplevingane med kvarandre. Start med det som var bra, hald fram med det som kan utviklast vidare. Kva har dei opplevd likt/ulikt?

3. Har alle ei felles forståing av kva som er bodskapen, og kven som er målgruppa?

4. Til slutt fortel du gruppa om arbeidet ditt med medieproduksjonen din. Fortel om val av målgruppe og tankane bak produksjonen.

Andre del: Eigen refleksjon

1. Kva tenkjer du no om arbeidet ditt? Fekk du respons som forventa? Har evalueringa gitt deg ny innsikt? Noter ned stikkord som du vil ta med deg vidare.

2. Juster produksjonen din før du leverer han dersom det er naudsynt.

Handgaard, B. (2020). Historiefortelling på digitale plattformer. Cappelen Damm Akademisk.