Die Welle

Die Welle er ein moderne versjon av Alex Grasshoffs The Wave frå 1981, som mange av lærarane i dag fekk oppleve då dei sjølv gjekk på ungdomsskulen.

Begge filmane er baserte på historielærar Ron Jones sitt omstridde sosiale eksperiment "The Third Wave", som fann stad i ein historieklasse i California i 1967.

I Die Welle ser ein fordelar, men også dei store konsekvensane ein får ved totalitarisme. Det er sterke scener mot slutten av filmen. Derfor har filmen 15-årsgrense.

Den rocka læraren Rainer Wenger kjem til ein vanleg tysk vidaregåande skule og er klar for å ha temaveke i historie. Han må litt motvillig undervise i temaet autokrati og startar derfor eit eksperiment i klassen.

Kan ein oppleve eit nytt diktatur i dag? spør læraren, og svar som “Aldri livet” og “Vi er for opplyste” blir gjentekne blant elevane. Etter ei avstemming blir Wenger leiar for gruppa mens eksperimentet pågår. Han startar med å innføre nokre enkle reglar som alle må følgje.

I løpet av veka gjer Wenger endringar i klassen. Små, ubetydelege endringar tenkjer ein kanskje først, men etter kvart påverkar disiplinen og fellesskapskjensla dei alle. Gruppa går med kvite skjorter, og dei kallar seg Bølgja. Dei får si eiga helsing, og etter kort tid blir alle som ikkje vil følgje idéane og endringane ein felles fiende.