69 minutter av 86 dager

Med ein liten Frost-ryggsekk på ryggen opplever vi verda blant buksebeina og bagane til alle dei vaksne rundt Lean. Familien har måtta flykte frå alt dei eig, og er no på ei farleg reise gjennom Europa.

På same tid som Lean oppfattar alvoret i situasjonen dei no er i, ser vi stort sett omgivnadene med nysgjerrige og leikne barneauge. Lean syng, leikar med småstein og tøysar med onkelen sin mens landegrenser stadig blir kryssa.

Regissør og fotograf Egil Håskjold Larsen har følgt familien gjennom Europa, og håper at ein i møtet med denne dokumentaren kan lære noko av barnet si openheit og tilpassingsdyktigheit i møte med det framande, og det vi ikkje forstår.

Mens flyktningkrisa i Middelhavet ligg som eit dystert bakteppe gjennom heile filmen, har Larsen ikkje ønskt å fokusere på den utanforståande ramma for historia.

69 minutter av 86 dager forsøkjer heller å setje sjåaren inn i livet som barn på ei slik reise – det universelle og det ein kjenner att i det å vere på reise, og det å vere ein familie.

Filmen har gått sin sigersgang på filmfestivalar over heile verda.

I 2017 vann han blant anna Emerging International Filmmaker Award på Hot Docs, Nord-Amerikas største dokumentarfilmfestival.

Filmen blei også nominert til Årets dokumentarfilm under Amandaprisutdelinga i 2017.

Fleire prisar:

• Beste dokumentar under Nordic International Film Festival og Sheffield International Documentary Festival
• Gullstolen ved Kortfilmfestivalen i Grimstad
• Nordic Dox Award på CPH:DOX i København