Komplementærkontrast

Større kontrastar gir meir liv. Ifølgje Itten er komplementærkontrast den sterkaste fargekontrasten. Den får du ved å bruke to fargar som står rett overfor kvarandre i fargesirkelen. Dei framhevar og forsterkar kvarandre.

Komplementærkontrasten skapar eit brot og vekkjer merksemda. Samtidig skal du vere litt forsiktig med å bruke mange slike kontrastar, sidan det kan skape støy.

Dei komplementære fargepara gjer kvarandre meir intense. Men viss du blandar dei i maling, vil det motsette skje: To komplementære fargar gir grå eller brun. Dette skjer fordi alle primærfargane (raud, blå og gul) er til stades i fargeblandinga samtidig.

Reine komplementærfargar har eit sterkt spenningsforhold og kan bli ubehagelege å sjå på viss dei blir lagde oppå kvarandre. Du kan dempe verknaden ved å blande inn kvitt og/eller svart i fargane. Då vil fargesamansetjinga bli meir harmonisk.