Oppgåve
Kven skal ha data om deg?
Vi legg att mykje data om oss sjølve på nettet. Kven bør ha tilgang på desse dataa? Løys oppgåver, og diskuter i klassen.
Når vi bruker mobilen til nettsøk og sosiale medium, legg vi samtidig att mykje data om oss sjølve. I tillegg finst det mykje data om oss i offentlege system. Bilete: NTB, Science Photo Library / CC BY-NC 4.0
Data er informasjon og opplysningar. Data om deg kan vere alder, telefonnummer, kjønn, bustad, karakterar, interesser, søkjelogg og kvar du var hen laurdag kveld klokka 22:30.
Ein dataforvaltar sit på mengder med informasjon om blant anna deg. Ein dataforvaltar kan vere skulen din, Google eller kommunen. Dataforvaltarar nyttar informasjonen om deg og andre til ulike føremål.
- Gjer oppgåva under, og trekk dei ulike dataa til dataforvaltarar du synest kan ha desse opplysningane om deg. Oppgåva har ingen fasit.
- Kva opplysningar om deg må ein kombinere for å forstå kven du er? Kvifor akkurat desse? Kva seier kategoriane om kven du eigentleg er?
Samanlikn det de kom fram til i den individuelle oppgåva, og diskuter.
- Korleis har de kopla ulike opplysningar til ulike kategoriar?
- Kva er likt, og kva er ulikt?
Køyr ein gjennomgang i plenum eller for læraren.
Løys deretter oppgåvene under i dei same gruppene.
- Kva kan dataforvaltarane gjere med dataa om dykk?
Lagre? Dele? Lage statistikk? Bruke dei i analysar? - Kva bør dei gjere med informasjonen, og kvifor?
- Når bør dataforvaltarar få tilgang til denne informasjonen?
Alltid? I særskilde tilfelle? Når noko uventa har skjedd? Når dei har ein mistanke om at du har gjort noko feil? - Les casen:
Case
Trine har nyleg snakka med vennene sine om eit dataspel ho har lyst på. Eit par dagar etter samtalen med vennene ser ho reklame for dataspelet på Facebook-tidslinja si.
Diskuter desse punkta om casen:
- Har de opplevd noko liknande?
- Er dette problematisk? Kvifor / kvifor ikkje?