Kven er dei andre, eigentleg?
Kven er eigentleg dei nye klassekompisane dine?
Arbeidet med eit portrettintervju gir deg eit godt utgangspunkt for å bli godt kjend med ein i klassen du ikkje kjende til frå før. Dessutan krev forarbeidet du skal gjere, at du må snakke med fleire elevar i klassen.
Sjangeren portrettintervju
I eit journalistisk portrettintervju er målet at lesaren skal bli betre kjend med ein person. Ulike sider ved intervjuobjektet skal komme fram, og journalisten prøver ofte å avdekke bestemte personlegdomtrekk og ukjende sider ved å gi att hendingar og situasjonar personen fortel om. Det er òg vanleg å beskrive kroppsspråket og miljøet personen er i under intervjuet.
Du skal no innta rolla som journalist og intervjuar, og gjere ein grundig jobb i førebuingane av intervjusituasjonen og gjennomføring av intervjuet. Til slutt skal du setje saman intervjuet.
Kva skal du gjere?
Arbeidet skal gå føre seg i denne rekkefølga:
Forarbeid
- Kva veit du om personen frå før? Kva lurer du på?
Research
- Gjer research i klassen.
- Gjer research på internett.
Førebuing til intervjuet
- Lag gode spørsmål.
- Førebu opptak.
Gjennomføring av intervjuet
- Sjølve intervjuet
Vel ut og set saman
- Vel ut.
- Set saman intervjuet.
Ferdigstilling
- Intervjuobjektet godkjenner bruk av sitat.
- Kvalitetssikring
Del med klassen
Skriv ut intervjuet slik at klassen kan lese det, eller la læraren legge intervjuet ut på læringsplattforma de bruker.
Startoppgåve: Finn intervjuobjektet ditt
Du får tre minutt til å løyse oppgåva på eiga hand.
Set deg ved sida av ein i klassen du aldri har snakka med tidlegare. Viss du har snakka med alle i klassen, set deg ved sida av den du synest du kjenner minst.
Du skal lage eit portrettintervju av den du sit ved sida av.