Lag og del ein NDLA-praterobot

Opprett ein eigendefinert praterobot

Dei fleste praterobotar kan gjere det meste du ber dei om. Ber du ein praterobot forklare deg fagomgrep, gjer han det. Ulempa er at han kan gi ganske lange, vanskelege svar.

Det kan vere lurt å lage din eigen spesialtilpassa robot. Det er ikkje så vanskeleg som det kanskje høyrest ut. Vi tek deg gjennom trinna.

Slik gjer du det

NDLA Praterobot ivaretek datasikkerheita til elevane og er godkjend for bruk i skulen. Du finn han ved å logge deg inn på Min NDLA. Du kan òg logge deg rett inn her: NDLA Praterobot.

1. Vel "Mine prateroboter".

2. Vel "Ny".

3. Gi roboten ein tittel, til dømes "Omgrepsforklarar".

4. Skriv inn ein systeminstruks (sjå tips og forslag lenger ned på sida).

5. Skriv inn eit innleiande spørsmål som roboten skal stille til brukaren.

6. Vel temperatur og modell.

7. Vel om du ønsker talespråk eller ikkje.

8. Opprett roboten.

Når roboten er oppretta, kan du sjå oppsettet, endre og dele med andre.

Korleis er oppsettet for ein praterobot i NDLA?

La oss seie at du skal lage ein praterobot som hjelper deg med å forstå vanskelege omgrep. Du treng å sjå døme på korleis eit omgrep blir brukt, for å forstå det betre. Du formulerer derfor ein systeminstruks for ein praterobot som gjer nettopp det. Her er éin måte å gjere det på:

Meir om systeminstruksar

Du er kanskje vand til å stille spørsmål til praterobotar? Det kan vere spørsmål eller instruksar som "Kan du foreslå argument?" eller "Finn skrivefeil i denne teksten.". Slike kommandoar i ein samtale med praterobotar kallar vi instruksar, leietekstar eller "prompts".

Vi bruker systeminstruksar for å lage eigne praterobotar. Ein systeminstruks er den overordna instruksen. Han bestemmer korleis roboten din skal svare. Du kan lage ein robot som til dømes

• svarer som om han er ein kjend person

• er ekspert på å forbetre setningar

• tek deg gjennom ein kreativ prosess

Mogelegheitene er uendelege.

Korleis bør ein systeminstruks sjå ut?

Det er viktig at du er ganske detaljert når du formulerer systeminstruksen. Jo meir konkret du er, jo betre svar vil prateroboten gi.

Gi prateroboten ei rolle, ein kontekst og ei målgruppe. Fortel detaljert kva han skal gjere, og korleis du vil at svaret skal sjå ut.

Test og juster systeminstruksen

Test ut og juster systeminstruksen til prateroboten om han ikkje fungerer slik du vil. Kanskje du vil ha døma lista opp i punkt eller sjå døme på korleis omgrepa blir brukt. Då må du justere systeminstruksen deretter.