Ytringsfridom og demokrati
I Noreg er ytringsfridommen ein rett nedfelt i Grunnloven § 100. I lova kan vi lese i eit litt omstendeleg språk:
"Ingen skal kunne holdes rettslig ansvarlig for å ha meddelt eller mottatt opplysninger, ideer og budskap." (Grunnlova, 1814)
I lova får vi også ei grunngiving for at vi treng ytringsfridom. Ytringsfridom er nemleg ein føresetnad dersom vi skal kunne søkje sanning og ha eit demokrati basert på den frie meiningsdanninga til individet. Berre tenk deg korleis det hadde vore å velje representantar til Stortinget utan informasjon om kva dei som stilte til val, meinte om ulike saker.
I det aller første punktet i Ver Varsam-plakaten kan vi lese:
"Ytringsfridom, informasjonsfridom og trykkjefridom er grunnelement i eit demokrati. Ei fri, uavhengig presse er blant dei viktigaste institusjonane i demokratiske samfunn." (Pressas Faglege Utval, 2015)
Media speler ei viktig rolle når det gjeld å formidle kva einskildpersonar og ulike grupper i samfunnet vårt meiner om ulike spørsmål. Det er i media vi får høyre om aktuelle saker, og det er jobben til journalistane å undersøkje og stille kritiske spørsmål på vegner av oss.
Den siste setninga i Grunnlova § 100 blir derfor mediepolitisk viktig. Der kan vi lese:
"Det påligger statens myndigheter å legge forholdene til rette for en åpen og opplyst offentlig samtale." (Grunnlova, 1814)
Dette kravet blir gjerne kalla «infrastrukturkravet». At staten har eit ansvar for at det er mogleg å ha ytringsfridom, syner kor viktig ytringsfridommen er for å kunne ha eit velfungerande demokrati.
Det er også her vi finn grunngivingar for å ha ein aktiv mediepolitikk. Alle dei mediepolitiske ordningane med momsfritak og pressestønad kan sjåast som tiltak nettopp for å leggje tilhøva til rette for at det faktisk er mogleg med reell ytringsfridom i landet.
Det same gjeld utbygginga av eit godt skulesystem. Veit vi ikkje kva vi snakkar om, kan vi ytre oss så mykje vi vil, men vi kjem kanskje ikkje så mykje lenger dersom vi verken kan lese, skrive eller ha kunnskap om og forståing av det som skjer i samfunnet.
Grunnloven. 1814. Kongeriket Norges Grunnlov (LOV-1814-05-17). Henta frå https://lovdata.no/dokument/NL/lov/1814-05-17
Pressas Faglege Utval (2015). Ver Varsam-plakaten. Henta 15. april 2020 frå https://presse.no/pfu/etiske-regler/vaer-varsom-plakaten/vvpl-nynorsk/